Petropavlda äleumettık jelı arqyly Soltüstık Qazaqstandy Resei Federasiiasyna qosudy ūsynǧan erlı-zaiyptylar bes jylǧa bas bostandyǧynan aiyryldy, dep habarlaidy “Adyrna” ūlttyq portaly.
Sot QR QK-nıŋ 180-babynyŋ 2-bölıgı (Qazaqstan Respublikasynyŋ bırtūtastyǧy men tūtastyǧyn, onyŋ aumaǧynyŋ qol sūǧylmauşylyǧy men bölınbestıgın jäne memlekettıŋ ydyrauyn ügıtteu) boiynşa erlı-zaiyptylarǧa qatysty qylmystyq ıs qozǧady.
Is materialdarynan anyqtalǧandai, erlı-zaiyptylar äleumettık jelılerde Qazaqstan Respublikasynyŋ Reseige Soltüstık Qazaqstan oblysynyŋ qosyluyna qatysty «Qazaqstan Respublikasynyŋ bırtūtastyǧyn saqtau tūrǧysynan saiasi jäne äleumettık täuekelderge äkep soqtyratyn äleumettık qauıptı mälımdemeler» jariialaǧan. Olar būl turaly «Chat ruletka» qosymşasynda aitqan.
Aita keteiık, būl qosymşa barlyq älemnıŋ paidalanuşylarmen beine arqyly bailanysuǧa mümkındık beretın tanymal servis.
"Erlı-zaiyptylardyŋ özderıne taǧylǧan ärekettı jasaudaǧy kınäsı ıs materialdarymen däleldengen. Sottaluşylardyŋ kınäsın moiyndamaǧanyna qaramastan, erlı-zaiyptylardyŋ kınäsı däleldendı. Iske beinejazba tırkelıp, män-jai jazylǧan. Qylmystyq qūqyq būzuşylyqty jasaǧany jäne oǧan qatysty keşendı sot-psihologiialyq-filologiialyq saraptamasy jürgızılgenı anyqtaldy», - dep habarlady Soltüstık Qazaqstan oblysy sotynyŋ baspasöz qyzmetı.
Prokuror aiyptaluşylardyŋ ärqaisysyn 5 jyldan bas bostandyǧynan aiyrudy sūrady. Sottaluşylar kınälaryn moiyndamai, aqtaudy sūrady.
Sonymen qatar, sotta atap ötılgendei, ekstremistık qylmystar sanatyna jatqyzylǧan būl äreket üşın bes jyldan on jylǧa deiıngı merzımge bas bostandyǧynan aiyru türındegı jaza qarastyrylǧan. Al Qylmystyq kodekstıŋ 63-babynyŋ 6-bölıgıne säikes, ekstremistık qylmys jasaǧany üşın şartty jaza qoldanylmaidy.
Iste sottaluşylardyŋ qylmystyq jauaptylyǧy men jazasyn auyrlatatyn da, jeŋıldetetın de män-jailar bolǧan joq.
"Joǧaryda aitylǧandarǧa bailanysty, sot auyr ekstremistık qylmys jasaǧany üşın kınälı dep tanylǧan sottaluşylarǧa eŋ tömengı jazany belgıledı. Sottaluşylardyŋ ärqaisysyna bes jylǧa bas bostandyǧynan aiyru jazasy taǧaiyndalyp, qylmystyq-atqaru jüiesınıŋ qauıpsızdıgı ortaşa mekemesınde öteuge sottaldy”, – dep qorytyndylady sot.
”Adyrna” ūlttyq portaly
