Petropavlda áleýmettik jeli arqyly Soltústik Qazaqstandy Reseı Federaııasyna qosýdy usynǵan erli-zaıyptylar bes jylǵa bas bostandyǵynan aıyryldy, dep habarlaıdy “Adyrna” ulttyq portaly.
Sot QR QK-niń 180-babynyń 2-bóligi (Qazaqstan Respýblıkasynyń birtutastyǵy men tutastyǵyn, onyń aýmaǵynyń qol suǵylmaýshylyǵy men bólinbestigin jáne memlekettiń ydyraýyn úgitteý) boıynsha erli-zaıyptylarǵa qatysty qylmystyq is qozǵady.
Is materıaldarynan anyqtalǵandaı, erli-zaıyptylar áleýmettik jelilerde Qazaqstan Respýblıkasynyń Reseıge Soltústik Qazaqstan oblysynyń qosylýyna qatysty «Qazaqstan Respýblıkasynyń birtutastyǵyn saqtaý turǵysynan saıası jáne áleýmettik táýekelderge ákep soqtyratyn áleýmettik qaýipti málimdemeler» jarııalaǵan. Olar bul týraly «Chat rýletka» qosymshasynda aıtqan.
Aıta keteıik, bul qosymsha barlyq álemniń paıdalanýshylarmen beıne arqyly baılanysýǵa múmkindik beretin tanymal servıs.
"Erli-zaıyptylardyń ózderine taǵylǵan áreketti jasaýdaǵy kinási is materıaldarymen dáleldengen. Sottalýshylardyń kinásin moıyndamaǵanyna qaramastan, erli-zaıyptylardyń kinási dáleldendi. Iske beınejazba tirkelip, mán-jaı jazylǵan. Qylmystyq quqyq buzýshylyqty jasaǵany jáne oǵan qatysty keshendi sot-psıhologııalyq-fılologııalyq saraptamasy júrgizilgeni anyqtaldy», - dep habarlady Soltústik Qazaqstan oblysy sotynyń baspasóz qyzmeti.
Prokýror aıyptalýshylardyń árqaısysyn 5 jyldan bas bostandyǵynan aıyrýdy surady. Sottalýshylar kinálaryn moıyndamaı, aqtaýdy surady.
Sonymen qatar, sotta atap ótilgendeı, ekstremıstik qylmystar sanatyna jatqyzylǵan bul áreket úshin bes jyldan on jylǵa deıingi merzimge bas bostandyǵynan aıyrý túrindegi jaza qarastyrylǵan. Al Qylmystyq kodekstiń 63-babynyń 6-bóligine sáıkes, ekstremıstik qylmys jasaǵany úshin shartty jaza qoldanylmaıdy.
Iste sottalýshylardyń qylmystyq jaýaptylyǵy men jazasyn aýyrlatatyn da, jeńildetetin de mán-jaılar bolǵan joq.
"Joǵaryda aıtylǵandarǵa baılanysty, sot aýyr ekstremıstik qylmys jasaǵany úshin kináli dep tanylǵan sottalýshylarǵa eń tómengi jazany belgiledi. Sottalýshylardyń árqaısysyna bes jylǵa bas bostandyǵynan aıyrý jazasy taǵaıyndalyp, qylmystyq-atqarý júıesiniń qaýipsizdigi ortasha mekemesinde óteýge sottaldy”, – dep qorytyndylady sot.
”Adyrna” ulttyq portaly
