شاكەن ايمانوۆ اتىنداعى “قازاقفيلم” ۇلتتىق كينوستۋدياسىنىڭ قاراماعىندا بولعان “كوشپەندىلەر قالاسى” دەكوراتسيالىق كەشەنى رەسمي تۇردە سىيعا بەرۋ شارتى نەگىزىندە قوناەۆ قالاسىنىڭ مەنشىگىنە تاپسىرىلدى. بۇل تۋرالى قالا اكىمدىگى ايتتى، دەپ حابارلايدى «ادىرنا» ءتىلشىسى.
«كوشپەندىلەر قالاسىنىڭ» اۋماعى 5,8 گەكتار، ول ىلە وزەنىنىڭ سول جاعالاۋىندا ورنالاسقان. نىساننىڭ بالانستىق قۇنى – 15,4 ميلليون تەڭگە. الايدا پايدالانۋ جىلدارى ىشىندە قالاشىق ايتارلىقتاي ەسكىرىپ، كەيبىر قۇرىلىس جارامسىز كۇيگە تۇسكەن، باستاپقى كەلبەتىنىڭ بىرقاتار ەلەمەنتتەرى جوعالعان»،—دەلىنگەن حابارلامادا.
قالالىق مەملەكەتتىك اكتيۆتەر جانە ساتىپ الۋ ءبولىمىنىڭ مالىمەتىنشە، ەندى قالاشىق تۇكش بولىمىنە قاراستى بولادى. الداعى ۋاقىتتا بۇل اۋماقتى تۋريزم باعىتىندا دامىتۋ كوزدەلىپ وتىر. سونداي-اق ونى كۇتىپ ۇستاۋعا، جوندەۋ جاساۋعا بيۋدجەتتەن قارجى قاراستىرىلادى.
«قالاشىققا اپاراتىن كۇرە جول سالىنىپ جاتىر. جولدىڭ ۇزىندىعى – 7 شاقىرىمعا جۋىق. جوبا بويىنشا قوسىمشا ەلەكتر جەلىلەرىن تارتۋ، اۆتوتۇراق سالۋ، جول بويىن جارىقتاندىرۋ قاراستىرىلعان. قۇرىلىسقا 41 ادام جانە 24 تەحنيكا تارتىلدى»،—دەپ تولىقتىردى اكىمدىك.
