يندونەزيادا پارلامەنت دەپۋتاتتارىنا ارنالعان ءىرى كولەمدەگى جاردەماقى بەكىتىلۋىنە جانە پوليتسەي كولىگى قاعىپ كەتكەن موتوتسيكليستىڭ ولىمىنە بايلانىستى مىڭداعان ادام قاتىسقان جاپپاي نارازىلىق اكتسيالارى ءوتتى، دەپ حابارلايدى "ادىرنا" ۇلتتىق پورتالى.
شەرۋ العاشىندا پارلامەنتتىڭ ءار دەپۋتاتقا اي سايىن 50 ميلليون رۋپي (شامامەن 3 ملن تەڭگە) كولەمىندە تۇرعىن ۇيگە جاردەماقى ءبولۋ تۋرالى شەشىمىنە قارسى باستالعان.
جاعدايدى 28 تامىزدا دجاكارتادا بولعان قايعىلى وقيعا ودان سايىن ۋشىقتىردى. پوليتسەي 43 جاستاعى كۋرەردى قاعىپ كەتىپ، ول سول جەردە قازا تاپقان. حالىق بۇل وقيعانى “جابايىلىق” دەپ اتاپ، كىنالىلەردى جازالاۋدى تالاپ ەتكەن.
وسىدان كەيىن دجاكارتادا جانە ەلدىڭ باسقا قالالارىندا نارازىلىق كۇشەيدى.
شەرۋشىلەر پارلامەنت پەن پوليتسيا عيماراتتارىن تاسپەن اتقىلاپ، كولىكتەردى ورتەدى. ماكاسساردا پارلامەنت عيماراتىنداعى ورتتەن كەمىندە ءۇش ادام كوز جۇمدى.
پرەزيدەنت پرابوۆو سۋبيانتو باستاپقىدا حالىقتى سابىرعا شاقىرىپ، مارقۇمنىڭ وتباسىنا كوڭىل ايتتى. كەيىن ول جەتى پوليتسەيدىڭ ۇستالعانىن حابارلاپ، ولارعا 20 تاۋلىككە قاماۋ تۇرىندەگى جازا قولدانىلعانىن مالىمدەدى.
سونىمەن قاتار مەملەكەت باسشىسى دەپۋتاتتارعا بەرىلەتىن جاردەماقىنى جويۋ جانە ولاردىڭ شەتەلدىك ءىسساپارلارىنا موراتوري ەنگىزۋ جونىندە شەشىم قابىلدادى.
بۇدان بولەك، پرابوۆو قىتايعا جوسپارلانعان ساپارىن توقتاتتى. ەل ىشىندە مەكتەپتەر مەن بانكتەر ۋاقىتشا جابىلىپ، قىزمەتكەرلەر قاشىقتان جۇمىس ىستەۋگە كوشتى.
