Астанадағы Достық үйінде Қазақстан Республикасы Конституциясының 30 жылдығына арналған «Ассамблея және Конституция: келісім мен тұрақтылық жолы» атты халықаралық ғылыми-тәжірибелік конференция ұйымдастырылды, деп хабарлайды «Адырна» ұлттық порталы.
Жиынға Maqsut Narikbayev University профессорлары, заңгерлер, этномәдени бірлестіктердің өкілдері, үкіметтік емес ұйымдар, сондай-ақ «Ассамблея жастары» республикалық қозғалысының мүшелері қатысты. Конференцияның модераторы – Астана қалалық ҚХА төрағасының қоғамдық орынбасары Халил Маслов.
Іс-шараны ҚР Парламенті Мәжілісінің депутаты Олжас Құспеков құттықтау сөзбен ашып, Конституцияның мемлекет іргетасы ретіндегі тарихи рөліне тоқталды:
«Конституция азаматтардың құқықтары мен бостандықтарын бекітіп қана қоймай, еліміздің даму бағытын айқындады. Бүгінде жастардың осы құндылықтарды сақтаудағы жауапкершілігін сезінуі өте маңызды», – деді ол.
Конференция барысында Астана қаласы ҚХА төрағасының орынбасарлары Халил Маслов пен Наргизам Махмудова, Әлеуметтік инноваторлар қауымдастығының президенті Гүлмира Пармышева, Инклюзивті қоғамды дамыту қауымдастығының вице-президенті Әлия Сәбитова, «Re Women Astana» ұйымының өкілі Сәуле Сағади және басқа да қоғам белсенділері сөз алып, өз ойларымен бөлісті.
Спикерлердің айтуынша, Конституция – еліміздің құқықтық және демократиялық мемлекет ретінде қалыптасуының, сондай-ақ қоғамдық келісім мен жалпыұлттық бірліктің берік кепілі. Сонымен қатар қатысушылар Ата Заңның қазақстандық даму моделіндегі тарихи миссиясына ерекше тоқталды.
