ازەربايجان پرەزيدەنتى يلحام اليەۆ ساۋد ارابياسىنىڭ “ال-ارابيا” تەلەارناسىنا بەرگەن سۇحباتىندا رەسەيمەن قارىم-قاتىناستىڭ ناشارلاۋىنا ازەربايجان كىنالى ەمەس ەكەنىن ايتتى، دەپ حابارلايدى "ادىرنا" ۇلتتىق پورتالى.
ول 2020 جىلعى 9 قاراشادا ەكىنشى قاراباح سوعىسىنىڭ سوڭعى كۇنى رەسەيلىك تىكۇشاقتىڭ شەكارا ماڭىندا قاتەلەسىپ اتىلعانىن ەسكە الىپ، سول كۇنى رەسەي پرەزيدەنتىنە حابارلاسىپ كەشىرىم سۇراعانىن، قازا تاپقانداردىڭ وتباسىلارىنا وتەماقى تولەگەنىن جانە كىنالىلەردىڭ جاۋاپقا تارتىلعانىن مالىمدەدى.
اليەۆ رەسەي تاراپىنان وسىنداي جاۋاپ كۇتتىك، بىراق ونىڭ ورنىنا رەسەيلىك تاراپتىڭ ارەكەتتەرى، اسىرەسە اۋە اپاتى مەن رەسەيدەگى ازەربايجاندىقتارعا قارسى شابۋىلدار، جاعدايدى ۋشىقتىرعانىن ايتتى. ول ەكى ازەربايجاندىق ازاماتىنىڭ ازاپتالىپ ولتىرىلگەنىن اتاپ ءوتىپ، رەسمي اقپاراتتا ولاردىڭ ءولىمى جۇرەك تالماسىنان بولدى دەپ كورسەتىلگەنىن سىنعا الدى.
ء“بىزدىڭ حالقىمىزعا قاتىستى مۇنداي اگرەسسيا مەن قۇرمەتسىزدىكتى ەشقاشان قابىلدامايمىز. ءبىز قارىم-قاتىناستى ناشارلاتقىمىز كەلمەيدى، تەك زاڭدى ءارى كونسترۋكتيۆتى جاۋاپ بەرەمىز”، – دەدى اليەۆ.
ەسكە سالايىق، ازەربايجاننىڭ AZAL اۋە كومپانياسىنىڭ جولاۋشىلار ۇشاعى 25 جەلتوقساندا رەسەي اۋماعىنان شىعىپ اقتاۋ قالاسىنا جاقىن ماڭدا اپاتقا ۇشىراعان ەدى. ۇشاق بورتىندا بولعان 67 ادامنىڭ 38-ءى قازا تاۋىپ، 29-ى امان قالدى. الدىن الا مالىمەتتەر بويىنشا، ۇشاق رەسەيدىڭ اۋە كەڭىستىگىندە، گروزنىي قالاسىنىڭ ۇستىندە سىرتقى فيزيكالىق جانە تەحنيكالىق اسەردىڭ سالدارىنان اپاتقا ۇشىراعان.
ال 27 ماۋسىمدا ەكاتەرينبۋرگ قالاسىندا ازەربايجاندىقتاردىڭ ۇيلەرىنە جۇرگىزىلگەن رەيد كەزىندە ەكى ادام قازا تاۋىپ، بىرنەشەۋى اۋىر جارالانعان بولاتىن. وسى وقيعادان كەيىن ازەربايجان سىرتقى ىستەر مينيسترلىگى رەسەيدىڭ باكۋدەگى ەلشىسى پەتر ۆولوكوۆتى شاقىرتىپ الىپ، وقىس وقيعاعا قاراتا قاتاڭ نارازىلىق ءبىلدىرىپ، قىلمىسقا قاتىسى بار كىنالى ادامداردى جاۋاپقا تارتۋدى ەسكەرتىپ ەدى. كەيىن ازەربايجاندا رەسەيدىڭ مەملەكەتتىك جانە جەكە مەكەمەلەرى جوسپارلاعان بارلىق بىرلەسكەن مادەني ءىس-شارالار توقتاتىلعانى ايتىلدى.
وسى وقيعالاردان بەرى ازەربايجان مەن رەسەي ءبىر-ءبىرىن كىنالاپ كەلەدى. اراسىندا ماسكەۋدە يلحام اليەۆتىڭ اكەسى، ازەربايجاننىڭ ەكس-پرەزيدەنتى گەيدار اليەۆتىڭ ەستكەرتكىشى اشىلعانىمەن، بۇل دا باكۋ مەن ماسكەۋ اراسىن جىبىتۋگە سەپتىگىن تيگىزە المادى.
