ۆاشينگتوندا ابايدىڭ 180 جىلدىق مەرەيتويىنا ارنالعان حالىقارالىق ۆەلوشەرۋ ءوز مارەسىنە جەتتى، دەپ حابارلايدى "ادىرنا" ۇلتتىق پورتالى 24kz-كە سىلتەمە جاساپ.
جوبا ەكى اي بۇرىن قاراعاندىداعى اباي مەكتەبىنەن باستالىپ، سەمەيگە جەتكەن سوڭ، مۇحيت اسىپ اقش-تا جالعاستى.
ۆەلوشەرۋدى تاجىريبەلى ۆەلوشاباندوز ەرنات راحمەتوللا ۇيىمداستىردى.
ساپاردىڭ باستى ماقساتى – سالاۋاتتى ءومىر سالتىن دارىپتەۋ جانە ابايدىڭ رۋحاني مۇراسىن ناسيحاتتاۋ. ەرنات جيدەبايدان ءبىر ۋىس توپىراق الىپ، ونى اقش-تا باقيلىق بولعان جازۋشى مۇحتار ماعاۋيننىڭ مەريلەندتەگى زيراتىنا جەتكىزدى. وسى ماقساتتا ول 1200 شاقىرىمدى جالعىز ءجۇرىپ ءوتتى. جول-جونەكەي نيۋ-يورك، نيۋ-دجەرسي، پرينستون، ترەنتون، فيلادەلفيا، بالتيمور قالالارىنا سوعىپ، وتانداستارمەن جانە ديماشتىڭ امەريكالىق جانكۇيەرلەرىمەن كەزدەستى.
ەرنات ساپار بارىسىندا اۋا رايىنىڭ كۇرت وزگەرىستەرىن، ىستىقتى، جاڭبىردى ەڭسەرگەنىن ايتىپ، اباي مەن ماعاۋين شىعارمالارى وعان رۋحاني كۇش بەرگەنىن جەتكىزدى.
ۆاشينگتوندا جەرگىلىكتى قازاق دياسپوراسىمەن كەزدەسۋ كەزىندە الداعى جىلى اقش قالالارى ارقىلى ەستافەتالىق ۆەلوشەرۋ ۇيىمداستىرۋ يدەياسى تالقىلاندى. سولتۇستىك امەريكاداعى قازاقستان مادەني-ىسكەرلىك قاۋىمداستىعى مەن دجوردج ۆاشينگتون ۋنيۆەرسيتەتىندەگى اباي ورتالىعى جوبانى قولداۋعا دايىن ەكەنىن مالىمدەدى.
قازىر ەرنات راحمەتوللا اقش استاناسىنان تۇركياعا اتتانىپ، اباي ۆەلوشەرۋىنىڭ جاڭا كەزەڭىن باستاماق. جاڭا مارشرۋت ىستامبۇلدان باستالىپ، ەلدىڭ ءىرى قالالارى ارقىلى ەدىرنەگە دەيىن جالعاسادى.
