وقۋ-اعارتۋ ءمينيسترى عاني بەيسەمباەۆ قوعامدا داۋ تۋعىزىپ جاتقان مەكتەپتە حيدجاب كيۋ تاقىرىبىنا قاتىستى تاعى دا پىكىر ءبىلدىردى، - دەپ حابارلايدى "ادىرنا" ۇلتتىق پورتالى.
ۇكىمەت كۋلۋارىندا جۋرناليست وتكەن اپتادا شەنەۋنىكتىڭ حيدجاب تاقىرىبىنا ناقتى جاۋاپ بەرە الماۋىنان قازىر الەۋمەتتىك جەلىدە ۇلكەن داۋ تۋىنداپ جاتقانىن ايتقان.
"مەكتەپكە حيدجاب كيىپ كەلۋگە بولا ما؟ ناقتى جاۋاپ بەرىڭىزشى. سەبەبى قازىر الەۋمەتتىك جەلىدە (وقۋ اعارتۋ مينيسترلىگى) مەكتەپتە حيدجاب كيۋگە رۇقسات بەردى دەگەن اقپارات تاراپ جاتىر", - دەگەن جۋرناليست.
"كونستيتۋتسيا بويىنشا قازاقستان زايىرلى مەملەكەت. مەكتەپ تە زايىرلى بولىپ سانالادى. 2016 جىلى بەكىتىلگەن وقۋشىلاردىڭ (مەكتەپتەگى) فورماسى مەن كيمىنە قاتىستى بۇيرىق بار. ول وزگەرگەن جوق. سوندىقتان بالالار مەكتەپكە وقۋشى فورماسىمەن كەلۋى كەرەك. بۇل بالالاردىڭ بىردەي ءبىلىم الۋى ءۇشىن جاسالىپ وتىر. سوندىقتان بۇل باعىتتا وزگەرىس جوق. ءبارى زاڭ اياسىندا ءارى بالالار مەكتەپكە بەلگىلەنگەن ءتارتىپ بويىنشا كەلۋى كەرەك", - دەيدى مينيستر عاني بەيسەمباەۆ.
جۋرناليست شەنەۋنىكتەن مەكتەپكە حيدجاب كيىپ كەلۋگە رۇقسات بار-جوعىن تاعى دا ناقتىلاعان.
"بۇيرىق بويىنشا سولاي، فورمامەن مەكتەپكە كەلۋ كەرەك. مەكتەپكە كەلۋدەگى ماقسات - بالانىڭ ساپالى ءبىلىم مەن سانالى تاربيە الا الۋى. ەندى كوتەرىپ وتىرعان ماسەلە (مەكتەپتە وقۋشىلاردىڭ حيدجاب كيىپ كەلۋى - ەسك.) مۇنى شەشە الا ما؟ ءبىرىنشى كەزەكتە ءبىز نەگىزگى ماقسات پەن ادامداردىڭ قوسىمشا ويىن شاتاستىرماۋىمىز كەرەك. بالا (مەكتەپتە - ەسك.) ساپالى ءبىلىم مەن سانالى تاربيە الۋعا مىندەتتى. ونى اتا-انا قامتاماسىز ەتۋگە مىندەتتى. ول زاڭدا بەلگىلەنگەن. سوندىقتان ءبارىمىز زاڭدى ورىنداۋعا مىندەتتىمىز", - دەپ جاۋاپ بەرگەن ول.
"ادىرنا" ۇلتتىق پورتالى
