مەملەكەت باسشىسى قاسىم-جومارت توقاەۆ قىتاي حالىق رەسپۋبليكاسىنىڭ قازاقستانداعى ەلشىسى حان ءچۋنليندى قابىلدادى. بۇل تۋرالى اقوردا جازدى، دەپ حابارلايدى "ادىرنا".
كەزدەسۋدە قاسىم-جومارت توقاەۆتىڭ قىتاي حالىق رەسپۋبليكاسىنا جاسايتىن الداعى ساپارىنا دايىندىق ماسەلەلەرى تالقىلاندى. سونداي-اق تيانتسزيندە وتەتىن شانحاي ىنتىماقتاستىق ۇيىمىنىڭ سامميتىنە جانە «شىۇ پليۋس» وتىرىسىنا قاتىسۋ باعدارلاماسى پىسىقتالدى.
پرەزيدەنت ەلىمىزدىڭ قىتايمەن جان-جاقتى ستراتەگيالىق سەرىكتەستىكتى تەرەڭدەتۋگە باسا ءمان بەرەتىنىن اتاپ ءوتتى.
مەملەكەت باسشىسى شىۇ ءسامميتى تابىستى ءوتىپ، ۇيىم تاريحىنىڭ جاڭا كەزەڭىنە جول اشاتىنىنا سەنىم ءبىلدىردى. بۇل وڭىرلىك سان قىرلى بايلانىستاردى ودان ءارى دامىتۋعا ىقپال ەتەدى.
ەلشى قازاق-قىتاي قارىم-قاتىناسىن بارلىق سالادا نىعايتۋعا تىڭ سەرپىن بەرەتىن بەيجىڭ مەن تيانتسزيندەگى ءىس-شارالاردى ناتيجەلى وتكىزۋگە بار كۇش-جىگەرىن جۇمسايتىنىن جەتكىزدى.
سونىمەن قاتار كەزدەسۋدە ەكى ەل اراسىنداعى ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىقپالداستىقتى دامىتۋ پەرسپەكتيۆاسى قاراستىرىلدى.
