مەملەكەت باسشىسى قاسىم-جومارت توقاەۆ قىرعىز رەسپۋبليكاسىنىڭ پرەزيدەنتى سادىر جاپاروۆتى "التىن قىران" وردەنىمەن ماراپاتتادى. بۇل تۋرالى اقوردا جازدى، دەپ حابارلايدى “ادىرنا”.
قاسىم-جومارت توقاەۆ ماراپاتتاۋ راسىمىندە سادىر جاپاروۆتى قىرعىز حالقىن العا باستاپ كەلە جاتقان ناعىز كوشباسشى، بىلىكتى ساياساتكەر دەپ بىلەتىنىن ايتتى.
"قىرعىزستاندى كوركەيتۋ جولىنداعى قاجىرلى ەڭبەگىڭىزدى جوعارى باعالايمىز. ساليقالى ساياساتىڭىزدىڭ ارقاسىندا ەلىڭىز دامۋدىڭ جاڭا كەزەڭىنە قادام باستى. قىرعىز ەكونوميكاسى جوعارى قارقىنمەن دامىپ كەلەدى" ، – دەگەن توقاەۆ قىرعىز جۇرتى بۇدان دا بيىك بەلەستەردى باعىندىرا بەرەتىنىنە سەنىم ءبىلدىردى.
مەملەكەت باسشىسى قازاقستاندا ءبىر تۋعان باۋىرلاس ەل رەتىندە قىرعىزستاننىڭ بارلىق جەتىستىكتەرىنە شىن جۇرەكتەن قۋاناتىنىن جەتكىزدى.
ء"سىز قىرعىز ەلىن وركەندەتۋ جولىندا تاباندى ەڭبەك ەتىپ، حالقىڭىزعا ادال قىزمەت ەتىپ كەلەسىز. سونداي-اق حالىقتارىمىز اراسىنداعى دوستىق قارىم-قاتىناستى نىعايتا تۇسۋگە وراسان زور ەڭبەك ءسىڭىرىپ جاتسىز. مۇنى بارشا قازاق جۇرتى جاقسى بىلەدى. وسىعان وراي، مەن ءسىزدى قازاقستان رەسپۋبليكاسىنىڭ ەڭ جوعارى مەملەكەتتىك ناگراداسى – "التىن قىران" وردەنىمەن ماراپاتتاۋ تۋرالى شەشىم قابىلدادىم. بۇل ناگرادا – قازاق ەلىنىڭ سىزگە جانە بۇكىل قىرعىز حالقىنا دەگەن ەرەكشە قۇرمەتى مەن شىنايى العىسىنىڭ رياسىز بەلگىسى، – دەدى پرەزيدەنت.
سادىر جاپاروۆ قازاقستان رەسپۋبليكاسىنىڭ جوعارى مەملەكەتتىك ناگراداسىمەن ماراپاتتاعانى ءۇشىن قاسىم-جومارت توقاەۆقا جانە قازاق حالقىنا العىس ايتىپ، مۇنى قىرعىز ەلىنە كورسەتىلگەن سىي-قۇرمەتتىڭ بەلگىسى رەتىندە قابىل العانىن جەتكىزدى. سونداي-اق بۇل ەكى ەلدىڭ ستراتەگيالىق سەرىكتەستىگى مەن وداقتاستىعىنىڭ جوعارى دەڭگەيىن ايقىندايتىنىن اتاپ ءوتىپ، ۋاقىتتىڭ بارلىق سىنىنان وتكەن ىنتىماقتاستىقتىڭ الداعى كەزەڭدە دە نىعايا بەرەتىنىنە سەنىم ءبىلدىردى.
