دەنساۋلىق ساقتاۋ ءمينيسترى اقمارال ءالنازاروۆا ۇرجارداعى قايعىلى وقيعادان زارداپ شەككەن بالالاردىڭ جاعدايىن ءبىلۋ ءۇشىن ەلورداداعى №2 كوپبەيىندى قالالىق بالالار اۋرۋحاناسى باردى دەپ، حابارلايدى «ادىرنا» ءتىلشىسى.
«بۇگىن دەنساۋلىق ساقتاۋ ءمينيسترى اقمارال ءالنازاروۆا جانە استانا قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى ءاليا شايزاداقىزى رۇستەموۆا ءۇرجاردا بولعان قايعىلى وقيعادان زارداپ شەككەن بالالاردىڭ جاي-كۇيىن ءبىلۋ ءۇشىن كەلدى. ساپار بارىسىندا ولار بالالاردىڭ اناسىمەن اڭگىمەلەستى»،—دەلىنگەن حابارلامادا.
اۋرۋحانانىڭ ءباسپاسوز قىزمەتى زارداپ شەككەندەرگە قاجەت بارلىق مەديتسينالىق كومەك تولىق كولەمدە كورسەتىلىپ جاتقانىن اتاپ ءوتتى.
«دارىگەرلەر بالالاردىڭ ءومىرىن قۇتقارۋ ءۇشىن قولدان كەلگەننىڭ ءبارىن جاساۋدا»،—دەپ تولىقتىردى مەكەمەنىڭ ءباسپاسوز قىزمەتى.
ەسكە سالايىق، 19 تامىزدا بەستەرەك اۋىلىندا 55 جاستاعى جۇرگىزۋشى كولىگىن باسقارا الماي، قاقپا الدىندا ويناپ جۇرگەن بالالاردى قاعىپ كەتكەن بولاتىن. اپات سالدارىنان 3 بالا كوز جۇمدى. تاعى ءۇش ءجاسوسپىرىم ءتۇرلى جاراقاتپەن اۋرۋحاناعا جەتكىزىلدى. 20 تامىزدا اۋرۋحاناعا تۇسكەن ءۇش بالانىڭ ەكەۋىن ساناۆياتسيا ۇشاعىمەن استاناعا الىپ كەتتى. اۋرۋحاناعا تۇسكەن ءۇش بالانىڭ دا باس سۇيەگى زاقىمدانعان. سونداي-اق تىرەك-قيمىل اپپاراتى مەن ىشكى اعزالارى جاراقاتتانعان.
قازىرگى تاڭدا جۇرگىزۋشى ۇستالىپ، ءۇرجار اۋدانىنىڭ ۋاقىتشا ۇستاۋ يزولياتورىنا قامالدى. مەديتسينالىق ساراپتاما ونىڭ جول اپاتى كەزىندە ەسىرتكى مەن ىشىمدىك قولدانباعانىن كورسەتتى.
