تۇركىستان وبلىسىندا بەنزيندى جەراستى توننەلى ارقىلى وزبەكستانعا زاڭسىز وتكىزۋمەن اينالىسقان ۇيىمداسقان قىلمىستىق توپقا قاتىستى سوت ۇكىمى شىقتى، دەپ حابارلايدى "ادىرنا" ۇلتتىق پورتالى.
سوت مالىمەتىنشە، توپ باسشىسى 15 جىلعا، ال ونىڭ سىبايلاستارى 13 جىلعا باس بوستاندىعىنان ايىرىلعان.
سونىمەن قاتار، قىلمىستىق جولمەن الىنعان 3 ملن تەڭگە، 16 مىڭ ليتر بەنزين، زيل جانە گاز جۇك كولىكتەرى مەملەكەت مەنشىگىنە تاركىلەندى.
تەرگەۋ دەرەكتەرىنە سايكەس، وتكەن جىلدىڭ شىلدەسىندە قازاقستاندىق ازامات وزبەكستان ازاماتىن سىبايلاس ەتىپ، ترانسۇلتتىق قىلمىستىق توپ قۇرعان. قىلمىسكەرلەر تۇركىستان وبلىسى سارىاعاش اۋدانىنداعى سارىقىراما اۋىلىندا ۇزىندىعى 375 مەتر بولاتىن جەراستى قۇبىرىن قازىپ، سول ارقىلى 2024 جىلدىڭ تامىزىنان جەلتوقسانىنا دەيىن 420 توننادان استام اي-92 ماركالى بەنزيندى شەكارا اسىرعان. ونىڭ جالپى قۇنى 112 ملن تەڭگەنى قۇراعان.
ۇكىم زاڭدى كۇشىنە ءالى ەنگەن جوق.
