تۇركىستاننان الماتىعا ۇشاتىن اۋە رەيسىنە وتىرعىزۋ كەزىندە جولاۋشى مەن اۋەجاي قىزمەتكەرىنىڭ اراسىندا داۋ تۋىندادى، دەپ حابارلايدى "ادىرنا" ۇلتتىق پورتالى Arasha.kz-كە سىلتەپ.
وقيعا 17 تامىزدا تۇركىستان اۋەجايىندا FS7162 رەيسىنە وتىرعىزۋ بارىسىندا تىركەلدى. FlyArystan اۋە كومپانياسىنىڭ رەسمي مالىمەتىنشە، جولاۋشى سوزگە كەلۋ كەزىندە قىزمەتكەردى يتەرىپ جىبەرگەن.
كۋاگەرلەردىڭ ايتۋىنشا، جانجالعا بايلانىستى ارنايى قىزمەتتەر شاقىرىلىپ، رەيس شامامەن ءۇش ساعاتقا كەشىكتى. جولاۋشى قىزمەتكەرلەر مەملەكەتتىك تىلدە سويلەۋى ءتيىس ەكەنىن ايتىپ، تالابىنان قايتپاعان.
FlyArystan وكىلدەرى جولاۋشىلاردان بەينەجازبانى ءوشىرۋدى سۇراعان. بۇل كوپشىلىك تاراپىنان تەرىس رەاكتسيا تۋدىردى. كومپانيا كەيىننەن تۇسىنىكتەمە بەرىپ، ۆيدەونىڭ كونتەكستەن ءۇزىپ الىنعانىن، ال بەينەماتەريالدى ءوشىرۋدى سۇراۋ جانجالدى باسەڭدەتۋ ءۇشىن جاسالعانىن مالىمدەدى.
«ءتيىستى قىزمەتتەر شاقىرىلدى. FlyArystan جەرۇستى قىزمەتىنىڭ وكىلى جاعدايعا وتىرعىزۋ اياقتالار ساتتە ارالاستى. ول جولاۋشىعا مىنەز-قۇلىق ەرەجەلەرىن تۇسىندىرۋگە تىرىستى. تاراتىلعان بەينەجازبا تولىق جاعدايدى قامتىمايدى»، – دەلىنگەن حابارلامادا.
جولاۋشىلاردىڭ سوزىنشە، داۋ تەك ءتىل ماسەلەسىنەن عانا ەمەس، رەيستىڭ كەشىگۋىنە بايلانىستى تۋىنداعان. كەيىن كومپانيا قىزمەتكەرى جولاۋشىلاردان كەشىرىم سۇراپ، ۇشاق الماتىعا ۇشقان.
