Türkıstannan Almatyǧa ūşatyn äue reisıne otyrǧyzu kezınde jolauşy men äuejai qyzmetkerınıŋ arasynda dau tuyndady, dep habarlaidy "Adyrna" ūlttyq portaly Arasha.kz-ke sıltep.
Oqiǧa 17 tamyzda Türkıstan äuejaiynda FS7162 reisıne otyrǧyzu barysynda tırkeldı. FlyArystan äue kompaniiasynyŋ resmi mälımetınşe, jolauşy sözge kelu kezınde qyzmetkerdı iterıp jıbergen.
Kuägerlerdıŋ aituynşa, janjalǧa bailanysty arnaiy qyzmetter şaqyrylyp, reis şamamen üş saǧatqa keşıktı. Jolauşy qyzmetkerler memlekettık tılde söileuı tiıs ekenın aityp, talabynan qaitpaǧan.
FlyArystan ökılderı jolauşylardan beinejazbany öşırudı sūraǧan. Būl köpşılık tarapynan terıs reaksiia tudyrdy. Kompaniia keiınnen tüsınıkteme berıp, videonyŋ konteksten üzıp alynǧanyn, al beinematerialdy öşırudı sūrau janjaldy bäseŋdetu üşın jasalǧanyn mälımdedı.
«Tiıstı qyzmetter şaqyryldy. FlyArystan jerüstı qyzmetınıŋ ökılı jaǧdaiǧa otyrǧyzu aiaqtalar sätte aralasty. Ol jolauşyǧa mınez-qūlyq erejelerın tüsındıruge tyrysty. Taratylǧan beinejazba tolyq jaǧdaidy qamtymaidy», – delıngen habarlamada.
Jolauşylardyŋ sözınşe, dau tek tıl mäselesınen ǧana emes, reistıŋ keşıguıne bailanysty tuyndaǧan. Keiın kompaniia qyzmetkerı jolauşylardan keşırım sūrap, ūşaq Almatyǧa ūşqan.
