شىمكەنت اكىمىنىڭ بۇرىنعى ورىنباسارى رۋسلان بەردەنوۆكە جاسالعان قاستاندىق ءىسى بويىنشا سوت ونىڭ جەكە ءوزى نەمەسە ونلاين فورماتتا وتىرىسقا قاتىسۋىن تالاپ ەتتى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
ءۇشىنشى سوت وتىرىسى كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتتا ءوتتى. سۋديا ءابىنۇر قاراباەۆ جابىرلەنۋشىنىڭ وكىلى جەڭىس تىنىبەككە بەردەنوۆپەن بايلانىسىپ، ونىڭ وفلاين نە ونلاين قاتىسۋ مۇمكىندىگىن ناقتىلاۋدى تاپسىردى. ەگەر ول مۇمكىن بولماسا، سوت تەرگەۋ بارىسىندا بەرىلگەن ايعاقتاردىڭ ۆيدەوجازباسىن قاراماق.
وتىرىستا قورعاۋشىلار وقيعا ورنىن قاراۋ حاتتاماسى مەن ەكى كۋاگەردىڭ ايعاقتارىن زاڭسىز دەپ تانۋدى سۇرادى. سونىمەن قاتار، اكىمدىك عيماراتىنداعى بەينەباقىلاۋ جازبالارى مەن تاركىلەنگەن ايعاقتار ۇسىنىلدى.
سوت جاڭا كۋاگەرلەردى تىڭدادى. ولاردىڭ ىشىندە قۇرىلىس باسقارماسىنىڭ قىزمەتكەرلەرى، اكىم ورىنباسارىنىڭ كومەكشىسى، ساۋلەت جانە قالا قۇرىلىسى باسقارماسىنىڭ بۇرىنعى ينسپەكتورى جانە ايىپتالۋشىنىڭ دوسى بار. كۋاگەرلەردىڭ ءبىرى ايىپتالۋشىنىڭ مىلتىقتى قاي جەردە تەكسەرگەنىن ايتىپ بەردى.
18 تامىزدا تاراپتاردىڭ ءجارىسسوزى ءوتىپ، ودان كەيىن سۋديا ۇكىم دايىنداۋعا كىرىسەتىنى كۇتىلۋدە. جابىرلەنۋشى تاراپتىڭ وكىلى بەردەنوۆ دەنساۋلىعى مۇمكىندىك بەرگەن ساتتە سوتتا ءسوز سويلەيتىنىن ايتتى.
ەسكە سالا كەتەيىك، 2025 جىلدىڭ 21 ساۋىرىندە شىمكەنت اكىمدىگى عيماراتى ماڭىندا بەردەنوۆكە قاستاندىق جاسالىپ، ول وڭ جاق سانى مەن يىعىنان جاراقات العان. ايىپتالۋشى ەرنار جيەنباي سوتتا وق اتۋعا جەكە سەبەپتەر يتەرمەلەگەنىن، قىلمىستىڭ بەردەنوۆتىڭ قىزمەتىنە قاتىسى جوق ەكەنىن جەتكىزگەن.
