ء“ىرى كوتەرمە جەتكىزۋشى ساتىپ العان”: قانت تاپشىلىعىن كوتەرمە ساتىپ العاندار قولدان جاساعان

2599
Adyrna.kz Telegram
فوتو: halyq-uni.kz
فوتو: halyq-uni.kz

قر پرەمەر-ءمينيسترى ءاليحان سمايىلوۆ ەكونوميكانى دەمونوپوليزاتسيالاۋ جونىندەگى كوميسسيانىڭ كەزەكتى وتىرىسىن وتكىزدى، وندا قانت نارىعىنداعى مونوپولياعا قارسى دەن قويۋ شارالارى قارالدى. بۇل تۋرالى ۇكىمەت باسشىسىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.

باسەكەلەستىكتى قورعاۋ جانە دامىتۋ اگەنتتىگىنىڭ توراعاسى سەرىك جۇمانعارين ەلىمىزدە قانتتىڭ نەگىزگى كولەمى جامبىل جانە الماتى وبلىستارىندا ورنالاسقان ءتورت زاۋىتتا وندىرىلەتىنىن اتاپ ءوتتى. 

«بۇل رەتتە ەلدە وندىرىلگەن قانتتىڭ نەگىزگى كولەمىن (شامامەن 90%) ءىرى كوتەرمە جەتكىزۋشىنىڭ ساتىپ العانى اتاپ ءوتىلدى، ونىڭ ءىس-ارەكەتتەرىنەن تاۋاردى اينالىمنان الىپ قويۋ بەلگىلەرى بايقالىپ وتىر، سونىڭ سالدارىنان قانتتىڭ نارىقتىق باعاسى 700-800 تەڭگەگە دەيىن كوتەرىلگەن، ال ءوندىرۋشى زاۋىت ونى 420-450 تەڭگەدەن ساتادى»، - دەلىنگەن حابارلامادا. 

قانت ساتۋدىڭ ديناميكاسىن زەرتتەۋ بارىسىندا ءار ايدىڭ سوڭىندا كومپانيادا ەلدىڭ جەكەلەگەن وڭىرلەرىندە سۇرانىستى ءىشىنارا قاناعاتتاندىرۋعا مۇمكىندىك بەرەتىن قالدىق قوردىڭ بولعانى انىقتالدى. وسىعان بايلانىستى باسەكەلەستىكتى قورعاۋ جانە دامىتۋ اگەنتتىگى مونوپولياعا قارسى زاڭنامانى بۇزۋ بەلگىلەرى بويىنشا تەرگەۋ تاعايىندادى. 

«قالىپتاسقان جاعدايدى وزگەرتۋ ءۇشىن نارىق سۋبەكتىلەرىنىڭ تاۋار بيرجاسى ارقىلى قانتتىڭ ەڭ از پارتيالارىن (60 توننا) وتكىزۋ بولىگىندە ولارعا باقىلاۋدى قاتاڭداتۋ، سونداي-اق يمپورتتاۋشىلاردى بيرجا ارقىلى قانت وتكىزۋدى جۇزەگە اسىرۋعا مىندەتتەۋ جانە ءوندىرۋشى زاۋىتتار ءۇشىن شيكىزات ساتىپ الۋعا اينالىم نەسيەلەرىن ءبولۋ ماسەلەسىن قاراۋ ۇسىنىلدى»، - دەلىنگەن حابارلامادا. 

پرەمەر-مينيستر ۇسىنىلعان تاسىلدەردى قولداپ، مەملەكەتتىك ورگاندارعا بىرقاتار قوسىمشا تاپسىرمالار بەردى. 

ۇكىمەت باسشىسى باسەكەلەستىكتى قورعاۋ جانە دامىتۋ اگەنتتىگىنە مونوپولياعا قارسى زاڭنامانى بۇزۋ بەلگىلەرى بويىنشا كومپانياعا قاتىستى تەرگەۋدى جالعاستىرۋدى تاپسىردى. 

قارجىلىق مونيتورينگ اگەنتتىگىنە وسى كاسىپورىننىڭ قىزمەتىن ىقتيمال بۇزۋشىلىقتار تۇرعىسىنان ەگجەي-تەگجەيلى تالداۋ تاپسىرىلدى. 

سونىمەن قاتار پرەمەر-مينيستر ساۋدا جانە ينتەگراتسيا مينيسترلىگىنە اۋىل شارۋاشىلىعى مينيسترلىگىمەن جانە وڭىرلەردىڭ اكىمدىكتەرىمەن بىرلەسىپ، وتاندىق قانت زاۋىتتارىنا شيكىزات ساتىپ الۋعا «اينالىم سحەماسى» بويىنشا قاراجاتتىڭ ءبىر بولىگىن جىبەرۋ ماسەلەسىن پىسىقتاۋدى تاپسىردى.

”ادىرنا” ۇلتتىق پورتالى

پىكىرلەر