قاراعاندى وبلىسىنىڭ ساران قالاسى مەن اباي وبلىسىنىڭ اياگوز قالاسىنان كەيىن پاتەرلەردەگى سۋىق تۋرالى اقپارات اقتوبەدەن دە كەلىپ ءتۇستى، دەپ حابارلايدى "ادىرنا" ۇلتتىق پورتالى.
بۇل تۋرالى قازتاگ مالىمدەدى.
«اقتوبەلىكتەر سۋىق پاتەرلەردە توڭىپ وتىر. كوپقاباتتى ۇيلەرگە جىلۋ قوسىلدى، بىراق بارلىق ۇيلەر وعان دايىن بولماي شىقتى»، – دەلىنگەن حابارلامادا.
17 قازان كۇنى ساران قالاسىنان كەيىن اباي وبلىسىنىڭ اياگوز قالاسىندا دا جىلۋدىڭ اپاتتىق ءوشىرىلۋى ورىن العان.
ايتا كەتەيىك، 15 قازان كۇنى پرەمەر-مينيستر ولجاس بەكتەنوۆ ۇكىمەت وتىرىسىندا ساران قالاسىنداعى جىلۋ بەرۋ ماۋسىمىنداعى توتەنشە جاعدايدى قاتاڭ باقىلاۋعا الۋ كەرەكتىگىن ايتقان بولاتىن. ۇكىمەت باسشىسى ءبارىن بۇگىن اياقتاۋدى تاپسىردى.
"بۇل – ساران قالاسى اكىمىنىڭ جەكە جاۋاپكەرشىلىگى جانە وبلىس اكىمدىگى تاراپىنان ءتيىستى باقىلاۋدىڭ جوقتىعى", - دەدى ولجاس بەكتەنوۆ.
قازىر اۆتوماتيكا نەلىكتەن ورتالىق جىلۋ كوزىن ەكى رەت توقتاتقانىن انىقتاۋ ءۇشىن ارنايى ماماندار كەلىپ جاتىر ەكەن.
“قازاندىق اۆتوماتتى اپاتتىق رەجيمگە قايتا ورالدى. بۇل ورناتۋ كەزىندە دۇرىس دەپ سانالادى. سوندىقتان قازىر ونىڭ نە سەبەپتى اپاتتىق رەجيمگە وتكەنىن انىقتاپ جاتىرمىز. قازاندىقتا جىلۋ بەرۋدىڭ ءبىر بولىگى نەلىكتەن توقتاپ قالعانىن قاجەتتى ماماندارمەن بىرلەسىپ تەكسەرىپ جاتىرمىز”، – دەدى قاراعاندى وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى تىلەكتەس دوساەۆ.
ەسكە سالا كەتەيىك، پرەمەر-مينيستر 24 قىركۇيەك كۇنى پرەزيدەنتكە بەرگەن ەسەبىندە ەلىمىزدىڭ وڭىرلەرى جىلۋ بەرۋ ماۋسىمىنا 98,3% دايىن دەپ سەندىرگەن ەدى.
«الەۋمەتتىك نىسانداردىڭ دايىندىعى جوعارى دەڭگەيدە. تۇرعىن ۇيلەردى جىلىتۋ ماۋسىمىنا ازىرلەۋ جۇمىستارى 98,3 پايىزعا ورىندالعان. ەلەكتر ستانتسيالارىنا جىل سايىن 60 ميلليون توننا كومىر قاجەت. قازىر ونىڭ قاجەتتى قورى بار»، - دەپ حابارلاعان بەكتەنوۆ.
