قىتايدا 23 شىلدەدەن بەرى حابارسىز كەتكەن 48 جاستاعى ءالىمنۇر تۇرعانبايدىڭ ۇستالعانىن قىتاي بيلىگى راستادى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
قازاقستاننىڭ قىتايداعى كونسۋلدىعىنىڭ مالىمەتىنشە، قىتاي قوعامدىق قاۋىپسىزدىك مينيسترلىگى حالىقارالىق ىنتىماقتاستىق باسقارماسى 11 تامىزدا رەسمي جاۋاپ جولداعان. وندا ءالىمنۇر تۇرعانبايدىڭ ءالى كۇنگە دەيىن قىتاي ازاماتى بولىپ سانالاتىنى جانە قىتايدا قوس ازاماتتىقتىڭ مويىندالمايتىنى اتاپ وتىلگەن.
سونداي-اق ونىڭ قىتاي ازاماتتىعىنان شىعۋعا رۇقسات الماعانى جانە اۆتوماتتى تۇردە ازاماتتىقتان ايىرىلۋ شارتتارىنا سايكەس كەلمەيتىنى كورسەتىلگەن.
ءالىمنۇر تۇرعانبايدىڭ جۇبايى گۇلداريا شەرزات بۇعان دەيىن كۇيەۋىنەن 23 شىلدەدەن بەرى حابار الا الماي وتىرعانىن ايتىپ، كومەك سۇراعان. ول كۇنى ءالىمنۇر جۇك كولىگىن ايداپ، شەكارادان وتكەن. قاسىنداعىلاردىڭ سوزىنشە، قىتاي شەكاراسىندا ونى پوليتسيا ۇستاپ اكەتكەن.
قىتاي تاراپى ازىرگە ونىڭ ۇستالۋ سەبەبى مەن ناقتى قايدا ەكەنى تۋرالى اقپارات بەرمەدى. قازاقستاندىق ديپلوماتتار بۇل ماسەلەگە قاتىستى كەلىسسوزدەردى جالعاستىرىپ جاتىر.
