ەممانۋەل ماكرون كامەرۋننىڭ تاۋەلسىزدىك ءۇشىن كۇرەس كەزەڭىندە ەلدە جۇرگىزىلگەن قاتاڭ رەپرەسسيالارداعى فرانتسيانىڭ ءرولىن رەسمي تۇردە مويىندادى، دەپ حابارلايدى "ادىرنا" ۇلتتىق پورتالى Report-قا سىلتەمە جاساپ.
ماكرون كامەرۋن پرەزيدەنتى پول بيياعا جولداعان حاتىندا بۇل مالىمدەمەنى 1945–1971 جىلدار ارالىعىنداعى فرانتسيانىڭ ءىس-ارەكەتىن زەرتتەگەن بىرلەسكەن فرانتسۋز-كامەرۋن كوميسسياسىنىڭ قورىتىندىسىنا سۇيەنە وتىرىپ جاساعان.
"تاريحشىلار كامەرۋندا سوعىس بولعانىن، سول كەزدە وتارشىل بيلىك پەن فرانتسۋز اسكەرى ەلدىڭ كەي ايماقتارىندا ءتۇرلى رەپرەسسيۆتى زورلىق-زومبىلىق تۇرلەرىن قولدانعانىن انىق ايتتى. بۇل سوعىس 1960 جىلدان كەيىن دە جالعاستى، فرانتسيا تاۋەلسىز كامەرۋن بيلىگىنىڭ ارەكەتتەرىن قولدادى. بۇگىن مەن وسى وقيعالارداعى فرانتسيانىڭ ءرولىن جانە جاۋاپكەرشىلىگىن مويىنداۋىم كەرەك", — دەلىنگەن پرەزيدەنتتىڭ حاتىندا.
بۇل مالىمدەمە قاڭتار ايىندا جاريالانعان ەسەپتەن كەيىن جاسالدى. وندا فرانتسيا جۇزدەگەن مىڭ كامەرۋندىقتى كۇشتەپ كوشىرۋ، ينتەرنيرلەۋ لاگەرلەرىنە جىبەرۋ جانە ەلدىڭ ەگەمەندىككە ۇمتىلىسىن باسۋ ءۇشىن قاتاڭ قارۋلى جاساقتاردى قولداۋ سەكىلدى ارەكەتتەرگە بارعانى ايتىلعان.
ايتا كەتەيىك، كامەرۋن العاشىندا گەرمانيانىڭ وتارى بولعان. ءبىرىنشى دۇنيەجۇزىلىك سوعىستان كەيىن ەل اۋماعى ۇلىبريتانيا مەن فرانتسيا اراسىندا ءبولىندى. بۇۇ قامقورلىعى اياسىندا فرانتسيا باقىلاۋىنداعى ايماق 1960 جىلى تاۋەلسىزدىك الدى. 1961 جىلى بريتاندىق كامەرۋننىڭ وڭتۇستىك بولىگى رەفەرەندۋم ارقىلى فرانتسۋز كامەرۋنىنا قوسىلدى.
