قازاقستان پرەزيدەنتى قاسىم-جومارت توقاەۆ ارمەنيا پرەمەر-ءمينيسترى نيكول پاشينياندى ارمەنيا مەن ازەربايجان اراسىنداعى بەيبىت كەلىسىمگە كەلۋىمەن قۇتتىقتادى. بۇل جايىندا اقوردا جازدى، دەپ حابارلايدى "ادىرنا".
ۆاشينگتوندا ارمەنيا مەن ازەربايجان بەيبىتشىلىك ورناتۋ تۋرالى دەكلاراتسياعا قول قويعان ەدى.
قازاقستان پرەزيدەنتىنىڭ پىكىرىنشە، بۇل تاريحي ماڭىزى بار قۇجات. پاشينياننىڭ ساياساتكەر رەتىندەگى العىرلىعىنىڭ ارقاسىندا قول قويىلعان.
دەكلاراتسيا وڭتۇستىك كاۆكازداعىاۋقىمدى حالىقارالىق ىنتىماقتاستىققا، سونداي-اق قازاقستان مەن ارمەنيا اراسىنداعى اناعۇرلىم قارقىندى ەكونوميكالىق جانە ينۆەستيتسيالىق ىقپالداستىققا جول اشادى.
قاسىم-جومارت توقاەۆ ارمەنيا پرەمەر-ءمينيسترىنىڭ جىل سوڭىنا جوسپارلانعان رەسمي ساپارىنا استانا ازىرلىك جۇمىستارىن باستاپ كەتكەنىن مالىمدەدى. قازاقستان كەلىسسوزدەرگە ءوز الاڭىن ۇسىنا وتىرىپ، ارمەنيا مەن ازەربايجان اراسىنداعى ساياسي ديالوگقا ودان ءارى سەپتىگىن تيگىزۋگە نيەتتى.
نيكول پاشينيان توقاەۆقا جىلى لەبىزى مەن قولداۋى ءۇشىن العىس ءبىلدىردى.
پرەمەر-مينيستر قازاقستاننىڭ ارمەنيا مەن ازەربايجاندى تاتۋلاستىرۋعا قوسقان ۇلەسىن وڭ باعالاعان. ءوزارا ىنتىماقتاستىقتى جانداندىراتىن جاڭا كەلىسىمدەرگە قول قويۋ ءۇشىن قازاقستانعا بيىل ارنايى ساپارمەن كەلۋگە دايىن ەكەنىن ايتقان.
مۇنىڭ الدىندا ازەربايجان وسى بەيبىت كەلىسىم ءماتىنىن جاريا ەتكەنبولاتىن.
