2025 جىلعى 8 تامىزدا فينليانديا استاناسىندا حالىقارالىق كينولوگيا فەدەراتسياسىنىڭ (FCI) اياسىندا وتكەن World Dog Show 2025 بۇكىلالەمدىك يتتەر كورمەسىندە قازاقى تازى تۇقىمىنىڭ رەسمي الەمدىك تۇساۋكەسەرى ءوتتى، دەپ حابارلايدى “ادىرنا” ۇلتتىق پورتالى Liter.kz سايتىنا سىلتەپ.
قازاقستان رەسپۋبليكاسى پرەزيدەنتى ءىس باسقارماسىنىڭ مالىمەتىنشە، حالىقارالىق جارىستارعا قاتىسۋ ءۇشىن قاتاڭ ىرىكتەۋدەن ءوتىپ، ارنايى دايىندىقتان وتكەن 8 تازىدان قۇرالعان قازاقستاندىق دەلەگاتسيا كورمەگە قاتىستى. الەمنىڭ تۇكپىر-تۇكپىرىنەن كەلگەن 25 مىڭنان استام ءيتتىڭ ىشىندە ءبىزدىڭ يتتەر تۇڭعىش رەت FCI مويىنداعان جەكە تۇقىم رەتىندە ونەر كورسەتتى.
جارىس ناتيجەلەرى ەلىمىز ءۇشىن ايتۋلى وقيعا بولدى: بەس تازى ءوز رينگتەرىندە جۇلدەلى ورىندارعا يە بولدى. 2025 جىلعى الەمنىڭ جاس چەمپيونى اتاعىن تەمىرلان ەسىمدى تازى جەڭىپ الدى. الەم چەمپيونى اتانعاندار لاشىن، ارۋ، ۆيتسە-چەمپيوندار — كوكسەرەك، پانا بولدى.
سونىمەن قاتار، لاشىن مەن ارۋ ءوز ساناتتارىندا فينليانديا چەمپيوندارى اتاعىنا دا يە بولدى.
قازاقستان پاۆيلونى – ۇلتتىق ەلەمەنتتەرى بار جارتىلاي كيىز ءۇي تۇرىندە بەزەندىرىلگەن. ول كورمە قوناقتارى مەن قاتىسۋشىلارى اراسىندا ۇلكەن قىزىعۋشىلىق تۋدىردى. قوناقتار تازى يتتەرىمەن سۋرەتكە ءتۇسىپ، تۇقىمنىڭ تاريحىمەن جانە ەرەكشەلىكتەرىمەن تانىستى.
قازاقستان كينولوگتار وداعىنىڭ ماماندارى تازىنىڭ شىعۋ تەگى، وزىندىك سيپاتتارى، ەرەكشە اڭشىلىق قاسيەتتەرى، سونداي-اق بۇل تۇقىم نەگە ۇلتتىق قازىنا بولىپ سانالاتىنى جانە نەگە قازاقتىڭ جەتى قازىناسىنىڭ قاتارىنا كىرەتىنى جايلى ايتىپ بەردى.
تازىنى ساقتاۋ جانە الەمگە تانىتۋ جۇمىستارى مەملەكەت باسشىسىنىڭ تاپسىرماسىمەن جۇزەگە اسىرىلىپ جاتىر جانە 2022 جىلعى تامىزدان باستاپ قر پرەزيدەنتى ءىس باسقارماسىنىڭ قامقورلىعىندا. ءۇش جىل ىشىندە قازاقستان كينولوگتار وداعىمەن بىرلەسىپ اۋقىمدى جۇمىستار اتقارىلدى.
- 2023 جىلعى تامىزدا قازاقستان كينولوگتار وداعى FCI-ءدىڭ تولىققاندى مۇشەسى بولىپ، ۇلتتىق تۇقىمداردى تانىستىرۋ قۇقىعىنا يە بولدى.
- 2024 جىلعى مامىردا استانادا مونوتۇقىمدىق كورمە ءوتىپ، وندا FCI كوميسسياسى 100 تازىنى تەكسەردى.
- 2024 جىلعى 3 قىركۇيەكتە امستەردامدا «قازاقى تازى» تۇقىمىنىڭ الدىن الا مويىندالۋى جانە قازاقستانعا ستاندارت يەسى مارتەبەسىن بەرۋ تۋرالى شەشىم قابىلداندى.
World Dog Show 2025 كورمەسىندەگى ونەر كورسەتۋ جانە تازىنىڭ حەلسينكيدەگى رەسمي تۇساۋكەسەرى وسى جولداعى ماڭىزدى قادامداردىڭ ءبىرى بولدى.
