رەسپۋبليكالىق «قانسونار» اڭشىلار قوعامدىق بىرلەستىگى مەن اڭشىلىق شارۋاشىلىقتارى قاۋىمداستىعى قازاق تازى يت تۇقىمىنىڭ رەسمي پاتەنت يەلەنۋشىسى اتاندى، دەپ حابارلايدى "ادىرنا" ۇلتتىق پورتالى ۇلتتىق زياتكەرلىك مەنشىك ينستيتۋتىنىڭ ءباسپاسوز قىزمەتىنە سىلتەمە جاساپ.
«قازاق تازىسىنىڭ» پاتەنت يەلەنۋشىسى – رەسپۋبليكالىق «قانسونار» اڭشىلار قوعامدىق بىرلەستىكتەرى مەن اڭشىلىق شارۋاشىلىقتارى قاۋىمداستىعى. جالپى، سەلەكتسيالىق جەتىستىككە پاتەنت جاڭاشىلدىق، ەرەكشەلىك، بىرتەكتىلىك جانە تۇراقتىلىق كريتەريلەرىنە سايكەس بولعان جاعدايدا بەرىلەدى. سەلەكتسيالىق جەتىستىككە پاتەنتپەن قامتاماسىز ەتىلەتىن قۇقىقتىق قورعاۋدىڭ كولەمى تۇقىم سيپاتتاماسىنا ەنگىزىلگەن بەلگىلەر جيىنتىعىمەن انىقتالادى»، – دەلىنگەن حابارلامادا.
پاتەنت 2021–2023 جىلدارى گەنەتيكا ينستيتۋتىمەن بىرلەسىپ جۇرگىزىلگەن زەرتتەۋلەر نەگىزىندە بەرىلدى. قازاق تازىسىنىڭ كليماتتىق جۇكتەمەلەرگە جوعارى توزىمدىلىگى، جۇيكە جۇيەسىنىڭ ەرەكشە تۇراقتىلىعى جانە كۋرسينگ سەكىلدى سپورتتىق جارىستارداعى ەرەكشە كورسەتكىشتەرى انىقتالدى.
«يتتەردىڭ جۇگىرىس كەزىندەگى جوعارى جۇمىس قابىلەتى مەن ءجۇرىسىنىڭ تۇراقتىلىعى ولاردىڭ جۇيكە جۇيەسىنىڭ فۋنكتسيونالدىق جاعدايىنا تىكەلەي بايلانىستى. قازاق تازىسىنىڭ جوعارى جۇيكە قىزمەتىنىڭ ەرەكشە تۇراقتىلىعى ونى باسقا تۇقىمداردان ايرىقشا ەتىپ كورسەتەدى. «قازاق تازى» تۇقىمىنىڭ يتتەرى مەحانيكالىق قويانعا جۇگىرەتىن كۋرسينگتە، سونداي-اق وسى تۇقىمنىڭ يتتەرىنە ارنالعان جارىستار مەن سىناقتاردا جوعارى ناتيجەلەر كورسەتەدى»، – دەپ اتاپ ءوتتى ءباسپاسوز قىزمەتى.
قاۋىمداستىق وكىلدەرى جىل سايىن ەل بويىنشا يتتەردىڭ تۇقىم ستاندارتتارىنا سايكەستىگىن باعالاۋ ءۇشىن اسىل تۇقىمدى كورمەلەر ۇيىمداستىرادى. تازى يتتەرى كەز كەلگەن كليماتتىق جاعدايعا – قىستىڭ قاتال سۋىعىنان باستاپ وڭتۇستىكتىڭ اپتاپ ىستىعىنا دەيىن وڭاي بەيىمدەلە الادى.
