8 تامىزعا قاراعان ءتۇنى ءيزرايلدىڭ سوعىس كابينەتى پرەمەر-مينيستر بينيامين نەتانياحۋدىڭ گازا قالاسىن تولىق باقىلاۋعا الۋ تۋرالى شەشىمىن بەكىتتى. بۇل تۋرالى Fox News ارناسىن نەتانياحۋدىڭ سۇحباتىن جاريالادى، دەپ حابارلايدى “ادىرنا”.
سۇحباتتا ول گازانى باقىلاۋعا العىسى كەلەتىنىن ايتقان. قازىرگى تاڭدا يزرايل اسكەرى گازا سەكتورىنداعى اۋماقتىڭ شامامەن 75 پايىزىن باقىلاپ وتىر.
Times of Israel باسىلىمىنىڭ مالىمەتىنشە، گازا قالاسىنا باعىتتالعان وپەراتسيا 800 مىڭعا جۋىق تۇرعىندى جاپپاي ەۆاكۋاتسيالاۋدى تالاپ ەتەدى.
«قارۋلى كۇشتەر گازا قالاسىن باقىلاۋعا الۋ ءۇشىن دايىندىق جۇرگىزەدى، سونىمەن قاتار سوعىس ايماعىنان تىس بەيبىت تۇرعىندارعا گۋمانيتارلىق كومەك كورسەتىلەدى»، – دەلىنگەن يزرايل ۇكىمەتىنىڭ مالىمدەمەسىندە.
نەتانياحۋ ءيزرايلدىڭ گازا سەكتورىن باسقارعىسى كەلمەيتىنىن، بىراق قاۋىپسىزدىك بەلدەۋىن قۇرىپ، ايماقتى وزىنە قاۋىپ توندىرمەيتىن اراب كۇشتەرىنە بەرگىسى كەلەتىنىن اتاپ ءوتتى.
ء«بىز حاماس-پەن بۇل مۇمكىن ەمەس ەكەنىن تۇسىنەمىز»، دەدى نەتانياحۋ.
ءيزرايلدىڭ باس شتابىنىڭ باستىعى ەيال زامير گازانى تولىق وككۋپاتسيالاۋ يدەياسىن قولداماي وتىر. جۋرناليستەردىڭ حابارلاۋىنشا، بۇل جوسپاردى «اسكەر ءۇشىن تۇزاق» دەپ اتاعان. دەگەنمەن ۇكىمەت ارمياعا قانداي شەشىم قابىلدانسا دا، ورىنداۋعا بۇيرىق بەرگەنىن مالىمدەدى.
يزرايل اسكەرى گازا قالاسىن باقىلاۋعا الىپ، شامامەن 1 ملن تۇرعىندى سەكتوردىڭ وڭتۇستىگىنە كوشىرۋدى كوزدەپ وتىر. بۇل ءبىرىنشى كەزەڭ. ەكىنشى كەزەڭ بىرنەشە اپتادان كەيىن باستالىپ، گۋمانيتارلىق كومەكتى ۇلعايتۋمەن قاتار، بوسقىندار لاگەرلەرى مەن تۇتقىندار بولۋى مۇمكىن دەگەن اۋداندارعا شابۋىل جاسالادى.
