6 تامىز كۇنى الماتى قالاسىنداعى وفيتسەرلەر ۇيىندە عارىشكەر، حالىق قاھارمانى تالعات مۇساباەۆپەن قوشتاسۋ ءراسىمى ءوتىپ جاتىر. قوشتاسۋ شاراسى تاڭعى ساعات 09:00-دە باستالدى، دەپ حابارلايدى "ادىرنا" ۇلتتىق پورتالى zakon.kz سايتىنا سىلتەمە جاساپ.
الماتىداعى 28 گۆاردياشى-پانفيلوۆشىلار اتىنداعى ساياباق ماڭىنا تالعات مۇساباەۆتىڭ تۋعان-تۋىستارى مەن جاقىندارىنان بولەك، ارىپتەستەرى، دوستارى، قوعام جانە مەملەكەت قايراتكەرلەرى، عارىش سالاسىنىڭ وكىلدەرى كەلدى. قوشتاسۋعا رەسەيلىك عارىشكەر، اۆياتسيا سپورتىنىڭ شەبەرى سەرگەي كريكالەۆ ارنايى ۇشىپ كەلىپ، ارىپتەسى جايلى جىلى لەبىزىن ءبىلدىرىپ، ونىمەن بىرگە جۇمىس ىستەگەنىن ماقتانىشپەن اتاپ ءوتتى.
سونداي-اق، قازاقستاندىق تانىمال عارىشكەرلەر توقتار اۋباكىروۆ پەن ايدىن ايىمبەتوۆ تە قوشتاسۋ راسىمىنە قاتىستى. فويەدە تالعات مۇساباەۆقا قۇرمەت رەتىندە ارنايى قاراۋىل ۇيىمداستىرىلعان.
مەملەكەت جانە قوعام قايراتكەرلەرى دە جيىندا بولدى. ولاردىڭ اراسىندا ءماجىلىس دەپۋتاتى ازات پەرۋاشەۆ، ءماسليحات توراعاسى مەيىرجان وتىنشيەۆ، عالىم راحمان الشانوۆ، زاپاستاعى گەنەرال-لەيتەنانت بەكسۇلتان سارسەكوۆ جانە باسقا دا تانىمال تۇلعالار بار. بارلىعى دا حالىق قاھارمانىنىڭ ەل دامۋىنا قوسقان ۇلەسىن اتاپ ءوتىپ، گۇل شوقتارىن قويىپ، رۋحىنا تاعزىم ەتتى.
قوشتاسۋ راسىمىنەن كەيىن 28 پانفيلوۆشى-گۆاردياشىلار اتىنداعى ساياباقتا قارالى ميتينگ وتەدى. ودان كەيىن تالعات مۇساباەۆ الماتىداعى كەڭساي زيراتىنا جەرلەنەدى.
تالعات امانگەلدىۇلى مۇساباەۆ 2025 جىلعى 4 تامىز كۇنى 75 جاسقا قاراعان شاعىندا ومىردەن ءوتتى. ول 1951 جىلى 7 قاڭتاردا الماتى وبلىسى جامبىل اۋدانىنىڭ فابريچنوە اۋىلىندا تۋعان. قازاقستاننىڭ حالىق قاھارمانى، تەحنيكا عىلىمدارىنىڭ دوكتورى، اۆياتسيا گەنەرال-لەيتەنانتى رەتىندە ەل تاريحىندا وشپەس ءىز قالدىردى.
ول عارىشقا ءۇش مارتە ۇشىپ، جالپى سانى 341 تاۋلىك 9 ساعات 46 مينۋت عارىش كەڭىستىگىندە بولدى. سونىمەن قاتار، 8 رەت اشىق عارىشقا شىققان، بۇل ساپارلاردىڭ جالپى ۇزاقتىعى – 43 ساعات 46 مينۋتتى قۇرايدى.
