كولىك ۆيتسە-ءمينيسترى ءساتجان ابلاليەۆ پارا الۋ كۇدىگىمەن قاماۋعا الىندى. بۇل تۋرالى بۇگىن، 4 تامىزدا ۇلتتىق قاۋىپسىزدىك كوميتەتىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«ۇقك-نىڭ سىبايلاس جەمقورلىققا قارسى قىزمەتى كولىك ۆيتسە-ءمينيسترىن پارا الۋ كۇدىگى بويىنشا ۇستادى. سوت سانكتسياسىمەن ول قاماۋعا الىندى»، – دەلىنگەن حابارلامادا.
ۇقك تەرگەۋ مۇددەسىنە بايلانىستى باسقا اقپارات جاريالانبايتىنىن اتاپ ءوتتى.
ەسكە سالايىق، 2 تامىزدا كولىك ۆيتسە-ءمينيسترى ءساتجان ابلاليەۆ پارامەن ۇستالدى دەگەن اقپارات تاراعان ەدى.
ءساتجان ايتەنۇلى 2023 جىلدىڭ 6 قازانىندا قازاقستان كولىك ۆيتسە-ءمينيسترى قىزمەتىنە تاعايىندالدى. ول بۇل قىزمەتىنىڭ الدىندا سولتۇستىك قازاقستان وبلىسى اكىمىنىڭ ورىنباسارى بولدى.
ۇقساس جاڭالىقتار
