رەسەي پرەزيدەنتى ۆلاديمير پۋتين ۆەدومستۆولىق كۇزەت قىزمەتكەرلەرىن اتىس قارۋىمەن جاراقتاندىرۋ تۋرالى زاڭعا قول قويدى. بۇل تۋرالى رەسەيلىك باق مالىمدەدى، دەپ حابارلايدى "ادىرنا" ۇلتتىق پورتالى.
جاڭا زاڭعا سايكەس، فەدەرالدى ورگاندار مەن ستراتەگيالىق ماڭىزى بار مەكەمەلەردىڭ ۆەدومستۆولىق كۇزەتىندە جۇمىس ىستەيتىن 250 مىڭعا جۋىق قىزمەتكەر اتىس قارۋىن ۋاقىتشا پايدالانۋ قۇقىعىنا يە بولادى. ولارعا كاليبرى 20 مم-گە دەيىنگى قارۋ مەن وق-ءدارى روسگۆارديا ماماندارىنىڭ ارنايى نۇسقاۋلىعىنان وتكەننەن كەيىن بەرىلەدى.
رەسمي تۇسىندىرمەگە ساي، بۇل شەشىم اۋە، سۋاستى جانە ءسۋۇستى درونداردان تونەتىن قاۋىپكە قارسى شارا رەتىندە قابىلدانعان. كۇزەتشىلەر قارۋمەن قوسا قورعانىس دۋلىعالارى مەن وزگە دە ارنايى قۇرالدارمەن دە جابدىقتالادى.
ايتا كەتەيىك، بۇرىن ۆەدومستۆولىق كۇزەت قىزمەتكەرلەرى قارۋ مەن ارنايى قۇرالداردى تەك وزدەرى كۇزەتەتىن نىسانداردا عانا جانە قىلمىسكەرلەردى تىكەلەي قۋدالاۋ بارىسىندا قولدانا الاتىن.
