ازەربايجاننىڭ Minval باسىلىمى رەسەيدىڭ كالينينگراد قالاسىن تاريحي اتاۋى "كەنيگسبەرگ" دەپ اتاعان، دەپ حابارلايدى "ادىرنا" ۇلتتىق پورتالى.
باسىلىم رەسەيلىك تاراپتىڭ سىنىنا ۇشىرادى. جاريالانعان جاڭالىقتاردىڭ ءبىرى "رەسەي كەنيگسبەرگتە س-400 جانە سوققى جۇيەلەرىن ورنالاستىردى" دەپ اتالعان.
بۇل مالىمدەمە تاسس اگەنتتىگىنىڭ حانكەند (ستەپاناكەرت) قالاسىنداعى ايۆازوۆسكي ەسكەرتكىشىنىڭ بۇزىلعانى تۋرالى جاڭالىعىنا قارسى جاريالانعان. رەسەيلىك باق جاڭالىقتارىندا سوۆەتتىك توپونيمدەردى قولدانعانى ءۇشىن باكۋ تاراپى نارازىلىق ءبىلدىردى.
ال ازەربايجان بيلىگى حانكەندتىڭ ورنىنا ستەپاناكەرت، قاراباقتىڭ ورنىنا تاۋلى قاراباق اتاۋلارىنىڭ قولدانىلۋىنا قارسى بولدى.
ازەربايجان سىرتقى ىستەر مينيسترلىگى رەسەيلىك اگەنتتىكتەن ءماتىندى تۇزەتۋدى تالاپ ەتىپ، ديپلوماتيالىق پروتەست جولدادى. ناتيجەسىندە تاسس جاڭالىق ماتىنىنە وزگەرىستەر ەنگىزىپ، تاقىرىپتا “قاراباق”، ال ءماتىن ىشىندە “حانكەند” اتاۋلارىن قولداندى.
باكۋ مالىمدەمەسىندە، ەگەر رەسەي تاراپى تاريحي اتاۋلاردى بۇرمالاۋدى جالعاستىرسا، ازەربايجان دا رەسەيلىك قالالاردىڭ تاريحي نەمەسە تۇركى اتاۋلارىن قولدانۋعا كوشۋى مۇمكىن ەكەنىن ەسكەرتكەن.
ايتا كەتەيىك، Caliber.az باسىلىمى تاسس اگەنتتىگىندەگى تاريحي اتاۋلارعا قاتىستى اقپارات تاراتقان بولاتىن.
