تيكتوك جەلىسىندە بەلگىلى اكتەر، "شانشار" تەاترىنىڭ ديرەكتورى ۋاليبەك ءابدىرايىموۆتىڭ جول اپاتىنان قازا تاپقانى تۋرالى اقپارات تاراپ، كوپشىلىكتى دۇرلىكتىردى، دەپ حابارلايدى "ادىرنا" ۇلتتىق پورتالى.
الايدا ءارتىستىڭ ءوزى اقپاراتتىڭ جالعان ەكەنىن رەسمي تۇردە مالىمدەدى.
جەلىدە تاراعان حابارلامادا ۋاليبەك ءابدىرايىموۆتىڭ شىمكەنتتە جول اپاتىنا ءتۇسىپ، كوز جۇمعانى، سونداي-اق ونىڭ قىلمىسقا قاتىسى بار دەگەن مالىمەت تە جازىلعان. اقپاراتتا "قازاق ونەرى قارا جامىلدى" دەگەن اۋىر سوزدەر مەن جالعان كۋاگەرلەردىڭ اتتارى اتالعان.
الايدا ۋاليبەك ءابدىرايىموۆ جەلىدەگى جەكە پاراقشاسىندا اقپاراتتىڭ جالعانى ەكەنىن ايتىپ، ءوزى امان-ەسەن ەكەنىن جەتكىزدى.
«ەفيرگە شىقپاسام بولمادى. مەن باتىس ەۋروپادا جۇرسەم، بىرەۋ مەنى ءولتىرىپ قويىپتى. جانازامدى، جەتىمىمدى ايتپاعاندارىنا وكپەلەدىم. قازىر گەرمانيادان كەلدىم. ءوزىم دە شوشىپ كەتتىم: ءتىرىمىن بە، الدە ولگەنمىن بە دەپ»، – دەپ ءازىل ارالاس جاۋاپ بەردى اكتەر.
سونداي-اق، ءارتىس جەلىدەگى پاراقشاسىنا بەينە جۇكتەپ، ءوزىنىڭ ساپاردا ەكەنىن كورسەتكەن.
جەلى جۇرتى دا "امان بولىڭىز", "جالعان اقپار تاراتقاندارعا جازا بار", "وتىرىك ايتۋعا بولمايدى عوي", "نەگە ادامدار ءولىم تىلەۋگە دايىن تۇرادى" دەگەن سىندى سان-الۋان پىكىر قالدىرعان.
