پاۆلوداردا اناسى تەرەزەدەن لاقتىرىپ جىبەرگەن ءبىر جارىم جاستاعى بالا 1 تامىز كۇنى كەشكە اۋرۋحانادا كوز جۇمدى. بۇل اقپاراتتى پاۆلودار وبلىسىنداعى بالا قۇقىقتارى جونىندەگى ۋاكىل ساۋلە شاكەنوۆا Instagram پاراقشاسىندا راستادى، دەپ حابارلايدى "ادىرنا" ۇلتتىق پورتالى.
"وكىنىشكە قاراي، دارىگەرلەر قولدان كەلگەننىڭ ءبارىن جاساعانىمەن، بالانىڭ جۇرەگى توقتاپ قالدى", – دەپ جازدى ۋاكىل.
پاۆلودار وبلىستىق بالالار اۋرۋحاناسى دا اقپاراتتى جوققا شىعارمادى. ماماندار ەكى كۇن بويى ءسابيدىڭ ءومىرى ءۇشىن كۇرەسكەن. اۋرۋحانا مالىمەتىنشە، 2024 جىلى تۋعان بالانىڭ جاعدايى وتە اۋىر ءارى تۇراقسىز بولعان. 1 تامىز كۇنى ساعات 20:10-دا جۇرەگى توقتاپ، ساعات 20:40-تا ءولىم تىركەلگەن.
بۇعان دەيىن بالانىڭ كلينيكالىق ءولىم جاعدايىندا اۋرۋحاناعا جەتكىزىلگەنى حابارلانعان ەدى. دارىگەرلەر جۇرەك سوعىسىن قايتا قالپىنا كەلتىرگەنىمەن، ىشكى قان كەتۋدىڭ سالدارىنان ونىڭ سول جاق بۇيرەگىن الىپ تاستاۋعا تۋرا كەلگەن. وتادان كەيىن دە جۇرەگى تاعى دا توقتاپ، دارىگەرلەر قايتا تىرىلتكەن ەدى.
پوليتسيا دەرەگىنشە، وقيعا 30 شىلدە كۇنى بولعان. الدىن الا دەرەكتەر بويىنشا، 34 جاستاعى ايەل ەكى بالاسىن بەسىنشى قاباتتىڭ تەرەزەسىنەن لاقتىرىپ، ارتىنان ءوزى دە سەكىرىپ كەتكەن. پوليتسيا دەپارتامەنتىنىڭ مالىمەتىنشە، زارداپ شەككەندەر پودەزدىڭ قالقالاعىشىنا قۇلاعان. ايەلدىڭ پسيحيكالىق دەنساۋلىعىنا بايلانىستى ارنايى مەديتسينالىق مەكەمەدە ەسەپتە تۇرعانى انىقتالعان.
جەتى جاستاعى ەكىنشى بالا امان قالىپ، قازىر وڭالىپ كەلەدى. 31 شىلدە كۇنى ول تراۆماتولوگيا بولىمىنە اۋىستىرىلعان.
قازىرگى ۋاقىتتا وقيعاعا بايلانىستى تەرگەۋ امالدارى جۇرگىزىلۋدە.
