ونەر جاناشىرى، ۇستاز سەرىك ماحمۇتۇلى ىدىرىسوۆ ومىردەن ءوتتى، دەپ حابارلايدى "ادىرنا" ۇلتتىق پورتالى.⠀
ول قىزىلوردا وبلىسى، قارماقشى اۋدانىنا قاراستى «جاڭاقالا» اۋىلىندا دۇنيەگە كەلگەن.
جاستايىنان جىر-تەرمەگە قۇمار بولىپ وسكەن سەرىك ىدىرىسوۆ قىزىلوردا پەداگوگيكالىق ينستيتۋتىنىڭ فيلولوگيا فاكۋلتەتىن ءتامامداپ، مۋزىكا مەن ءتىل پانىنەن ساباق بەردى.
ءوزىنىڭ العاشقى ەڭبەك جولىن №185 مەكتەپتەن باستاپ، اۋىل وقۋشىلارىنان وركەستر قۇرىپ، ولاردىڭ ونەرىن رەسپۋبليكا كولەمىندە تانىتتى. مەكتەپ قابىرعاسىندا قۇرىلعان بۇل وركەستر الماتىداعى تەلەارنالاردان كورسەتىلگەن.
سەرىك ىدىرىسوۆ تۋرالى جەلىدە ءتۇرلى ەستەلىكتەر جاريالانۋدا.
اقىن ءسابي اڭسات:
"سەرىك ىدىرىسوۆ باۋىرىمنىڭ دۇنيەدەن وزعانىن ەستىپ وتىرمىن.
اللا ۇلكەن ءبىر اۋىرتپالىقتى كولدەنەڭ تارتىپتى.
سەرىك مەنىڭ، ءسىزدىڭ، دوستىڭ، جولداستىڭ، ارىپتەستەردىڭ، ەلدىڭ سەرىگى ەدى. سەرىكسىز، ونىڭ ءازىلىنسىز، ونىڭ قالجىڭىنسىز، باتاعا بەرگىسىز ءباتۋالى ءسوزىنسىز تويىمىز كوڭىلسىز، ويىمىز ورتا بولاتىن سياقتى كورەمىن. سەرىك ءسوز كوتەرەتىن كىشىپەيىل ەدى، اعانى سىيلاۋدىڭ ۇلگىسى ەدى. كۇلىمسىرەگەن ديدارى قىمبات ەدى. بارلىعىمىزدىڭ قيماسىمىز ەدى. اللانىڭ امىرىنە نە شارا؟! سەرىكتىڭ وتباسىنا، اۋلەتىنە قايعىلىرىنا ورتاقتاسىپ، قازانىڭ ارتىن قايىرلى ەتسىن دەپ كوڭىل بىلدىرەمىن.
باقۇل بول جارقىن ءجۇزدى باۋىرىم - سەرىكجانىم", - دەپ ەسكە الدى.
رۋسلان كايۋپوۆ:
"قوش بول، اقىن اعا! ابىز اعا!
الاشقا بەلگىلى اقىن، قازاقستاننىڭ ونەر قايراتكەرى، قر مادەنيەت سالاسىنىڭ ۇزدىگى، ۇلكەن جۇرەكتى ۇستاز ىدىرىسوۆ سەرىك ماحمۇتۇلى كەلمەستىڭ كەمەسىنە ءمىنىپ، ماڭگىلىك ساپارعا اتتاندى.
اقتىق ساپارعا شىعارىپ سالۋ قارالى ميتينگ 1 تامىز كۇنى ساعات 15:30-دا، جانازا نامازى 16:00.
وتەتىن ورنى: قىزىلوردا قالاسى، ىدىرىسوۆ تۇيىعى 4-ءشى ءۇي", - دەپ جازدى.
