قازاق ادەبيەتىنىڭ كورنەكتى وكىلى، جازۋشى-دراماتۋرگ، قازاقستاننىڭ ەڭبەك ەرى دۋلات يسابەكوۆ 83 جاسىندا دۇنيەدەن ءوتتى، دەپ حابارلايدى “ادىرنا” ۇلتتىق پورتالى.
قارالى حاباردى قازاقستان جازۋشىلار وداعى توراعاسىنىڭ ورىنباسارى قاسىمحان بەگمانوۆ جەتكىزدى.
“قايران، دۋلات اعام-اي، مىناۋ جارىق دۇنيەدەن ءسىزدىڭ دە كەتكەنىڭىز بە؟ وسى قازىر عانا ەستيار دۋلاتۇلى ىنىشەگىم ماعان وسىناۋ الاپات قايعىلى حاباردى جىلاپ تۇرىپ جەتكىزدى. قازاقستان جازۋشىلار وداعىنىڭ توراعاسىنا، ەل اعالارىنا قارالى حاباردى جەتكىزدىم. قازىر اعامنىڭ ۇيىنە قاراي كەتىپ بارا جاتىرمىن… ءيا، قازاق ادەبيەتىنىڭ كلاسسيگى، جازۋشى-دراماتۋرگ دۋلات يسابەكوۆ ومىردەن ءوتتى. قازاق حالقىنا كوڭىل ايتامىن”، – دەپ جازدى ول الەۋمەتتىك جەلىدەگى پاراقشاسىندا.
دۋلات يسابەكوۆ 1942 جىلى تۇركىستان وبلىسىنىڭ (بۇرىنعى وڭتۇستىك قازاقستان وبلىسى) سايرام اۋدانىندا دۇنيەگە كەلگەن. 1966 جىلى قازاق مەملەكەتتىك ۋنيۆەرسيتەتىن تامامداعان.
دۋلات يسابەكوۆ – قازاق ادەبيەتىنە ولشەۋسىز ۇلەس قوسقان قالامگەر. ونىڭ “گاۋھارتاس”، “قارعىن”، “دەرمەنە”، “اپكە” سىندى شىعارمالارى حالىقتىڭ جۇرەگىنەن ەرەكشە ورىن العان.
ەسكە سالا كەتەيىك، وسىعان دەيىن مارقۇمنىڭ دەنساۋلىعى سىر بەرىپ، اۋىرعانى تۋرالى بەيرەسمي اقپارات جەلىدە تاراعان بولاتىن.
