قازاقستاندا جانارماي باعاسى كورشى ەلدەرمەن تەڭەسپەك، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
بۇل تۋرالى پرەمەر-ءمينيستردىڭ ءبىرىنشى ورىنباسارى رومان سكليار ۇكىمەت ۇيىندە وتكەن ءباسپاسوز ءماسليحاتىندا مالىمدەدى.
ونىڭ ايتۋىنشا، ەلىمىز جىلىنا 90 ميلليون توننادان استام مۇناي وندىرسە دە، مۇناي ونىمدەرىن وڭدەۋ كورسەتكىشى ءالى دە جەتكىلىكتى دەڭگەيدە ەمەس.
"2017-2019 جىلدارى ءۇش مۇناي وڭدەۋ زاۋىتى قايتا قۇرىلىپ، جانارماي ءوندىرىسى ەداۋىر ارتتى. سودان بەرى بەنزين، ديزەل جانە اۋە كەروسينى بويىنشا تاپشىلىق توقتادى. الايدا، سوڭعى جىلدارى اۋە كەروسينىنە سۇرانىس كۇرت ءوستى، سوندىقتان تاپشىلىق قايتا بايقالىپ وتىر", — دەدى ۆيتسە-پرەمەر.
سكلياردىڭ ايتۋىنشا، قازاقستاننان جانارمايدىڭ سىرتقا زاڭسىز اكەتىلۋىن بولدىرماۋ ءۇشىن باعا كورشى نارىقتارمەن تەڭەستىرىلەدى.
"باعانى بىرتىندەپ تەڭەستىرۋ ارقىلى ىشكى نارىقتى قورعايمىز. سونىمەن قاتار، ىشكى ءوندىرىستى ۇلعايتۋعا كۇش سالىنادى. ماسەلەن، شىمكەنت مۇناي وڭدەۋ زاۋىتىنىڭ ەكىنشى كەزەڭى ىسكە قوسىلسا، ءوندىرىس كولەمى 6 ملن توننادان 12 ملن تونناعا دەيىن ارتادى. بۇدان بولەك، پاۆلودار مەن اتىراۋ زاۋىتتارىنىڭ قۋاتىن ارتتىرۋ بويىنشا دا شارالار قابىلدانادى", — دەدى ول.
