2019 جىلى الماتى ماڭىندا اپاتقا ۇشىراعان Bek Air اۋە كومپانياسىنىڭ ۇشاعىنا بايلانىستى قىلمىستىق ءىس قايتا تەرگەلەتىن بولدى، دەپ حابارلايدى "ادىرنا" ۇلتتىق پورتالى.
بۇل تۋرالى كولىك ءمينيسترى مالىمدەدى.
"وكىنىشكە قاراي، اۆياتسيا سالاسىندا مۇنداي وقيعالار سيرەك ەمەس، جانە ولاردىڭ سەبەبىن ناقتى انىقتاۋ كوپ جاعدايدا ۇزاق ءارى كۇردەلى ۇدەرىس. اۆياتسيالىق اپاتتارعا قاتىستى تەرگەۋ جۇمىستارى ۇزاققا سوزىلادى. قازىرگى ۋاقىتتا بارلىق قاجەتتى قۇجاتتار دايىندالىپ جاتىر", – دەدى مينيستر نۇرلان ساۋرانباەۆ ۇكىمەت ۇيىندە وتكەن ءباسپاسوز ءماسليحاتىندا.
سونداي-اق ساۋرانباەۆ تىلشىلەردىڭ “اتالعان كومپانياعا قاتىستى قىلمىستىق ءىس قايتا تەرگەلە مە؟” دەگەن ساۋالىنا ناقتى ء“يا” دەپ جاۋاپ بەردى.
2019 جىلدىڭ 27 جەلتوقسانىندا تاڭعى ساعات 7:20 شاماسىندا الماتى – نۇر-سۇلتان باعىتىندا ۇشۋعا ارنالعان Bek Air كومپانياسىنىڭ Fokker-100 ۇشاعى اۋەگە كوتەرىلە سالا راداردان جوعالىپ كەتكەن. كەيىن ۇشاق الماتى اۋەجايى ماڭىندا اپاتقا ۇشىراعانى بەلگىلى بولدى. بورتتا 95 جولاۋشى جانە 5 ەكيپاج مۇشەسى بولعان.
ۇشاق اپاتتان كەيىن جەرگە سوعىلىپ، سىرعاناي وتىرىپ جاقىن ماڭداعى اۋىل شەتىندەگى ەكى قاباتتى تۇرعىن ۇيگە سوعىلعان. وقيعا سالدارىنان 12 ادام قازا تاۋىپ، ونداعان ادام جاراقات العان. اپاتتان كەيىن Bek Air كومپانياسىنىڭ بارلىق Fokker-100 اۋە كەمەلەرىنىڭ قىزمەتى توقتاتىلدى.
