پاۆلوداردا ءىىم مامانداندىرىلعان كۇزەت باسقارماسىنىڭ ماس باستىعى ايدار نۇرمۇحامبەتوۆتىڭ Lexus كولىگىن تىزگىندەۋ كەزىندە ادام ولىمىنە اكەپ سوقتىرعان جول-كولىك وقيعاسى بويىنشا سوت ۇكىمى شىقتى، دەپ حابارلايدى “ادىرنا” قازتاگ اگەنتتىگىنە سىلتەپ.
«سوت ن. ايدار نۇرمۇحامبەتوۆتى قىلمىستىق كودەكستىڭ 345-1-بابىنىڭ 3-بولىگىمەن (جول ءجۇرۋ ەرەجەلەرىن نەمەسە كولىك قۇرالدارىن باسقارۋ كەزىندە الكوگولدىك، ەسىرتكىلىك نەمەسە توكسيكوماندىق ماساڭدىق كۇيىندە كولىك قۇرالدارىن باسقارعان تۇلعالار تاراپىنان جول قوزعالىسى ەرەجەلەرىن بۇزۋ) قىلمىستىق قۇقىق بۇزۋشىلىق جاساعانى ءۇشىن كىنالى دەپ تانىپ، وعان ءۇش جىل التى ايعا باس بوستاندىعىنان ايىرۋ جازاسىن جانە كولىك قۇرالدارىن باسقارۋ قىزمەتىمەن اينالىسۋعا 10 جىلعا دەيىن تىيىم سالۋ جازاسىن تاعايىندادى»، - دەپ مالىمدەدى پاۆلودار قالاسىنىڭ №2 سوتىنىڭ سۋدياسى بيبىگۇل سابيتدەنوۆا جۇما كۇنى.
جول اپاتى 2024 جىلدىڭ 27 شىلدەسىندە تۇندە پاۆلودار ماڭىندا بولعان. الكوگولدىك ماساڭ كۇيدە بولعان نۇرمۇحامبەتوۆ جىلدامدىقتى اسىرعان جانە اراقاشىقتىقتى ساقتاماعان كۇيدە Lexus اۆتوكولىگىمەن الدىڭعى جاقتا كەلە جاتقان «ۆولگا» كولىگىنە سوعىلعان. وسىنىڭ سالدارىنان «ۆولگا» كولىگى اۋدارىلىپ كەتىپ، جۇرگىزۋشىسى وقيعا ورنىندا كوز جۇمدى. «ۆولگا» كولىگىنىڭ جولاۋشىسى اۋىر جاراقات الىپ، ءىى توپ مۇگەدەگى بولىپ قالدى. سونداي-اق، اپات ورنىنا كەلگەننەن كەيىن «ۆولگا» كولىگىندە بولعان بالا اۋرۋحاناعا ءتۇستى.
جۇرگىزۋشى سول كۇنى-اق قاماۋعا الىندى. 38 جاستاعى نۇرمۇحامبەتوۆ، بۇرىن استانادا ۇكىمەتتىك مەكەمەلەردى قورعاۋ ارنايى قىزمەتىنىڭ باسقارماسىن باسقارعان، جازاسىن قاۋىپسىزدىگى تومەن قىلمىستىق-اتقارۋ مەكەمەسىندە وتەيتىن بولادى. سونىمەن قاتار، ول مارقۇمنىڭ تۋىستارىنا 10 ميلليون تەڭگەدەن استام جانە «ۆولگا» كولىگىنىڭ جولاۋشىسىنا 7 ميلليون تەڭگەدەن استام ماتەريالدىق جانە مورالدىق شىعىنداردى تولەۋگە مىندەتتى.
ۇكىم زاڭدى كۇشىنە ەنگەن جوق.
