30 شىلدە كۇنى پاۆلودار قالاسىندا نۇرماعامبەتوۆ كوشەسىندەگى كوپقاباتتى ۇيلەردىڭ بىرىندە ايەل ادام ەكى بالاسىن بەسىنشى قاباتتان لاقتىرىپ، ارتىنشا ءوزى دە سەكىرىپ كەتكەن، دەپ حابارلايدى "ادىرنا" ۇلتتىق پورتالى.
وبلىستىق جەدەل جاردەم ستانتسياسىنىڭ مالىمەتىنشە، شاقىرتۋ “103” قىزمەتىنە ساعات 13:00-دە تۇسكەن. كوشەدەن ءوتىپ بارا جاتقان ادام دەرەۋ حابار بەرگەن.
وقيعا ورنىنا ءبىرىنشى كەزەكتەگى شۇعىلدىقپەن ءۇش جەدەل جاردەم توبى جىبەرىلگەن. مەديتسينالىق قىزمەتكەرلەر التى مينۋت ىشىندە جەتىپ، العاشقى كومەك كورسەتىلگەن.
"ەكى بالا اۋىر حالدە وبلىستىق بالالار اۋرۋحاناسىنا جەتكىزىلدى. ايەل ادام دا اۋىر جاعدايدا پاۆلودار قالالىق №1 اۋرۋحاناسىنا جەتكىزىلگەن" - دەلىنگەن جەدەل جاردەم ستانتسياسى تاراتقان رەسمي حابارلامادا.
بالا قۇقىقتارى جونىندەگى ۋاكىل ساۋلە شاكەنەۆانىڭ ايتۋىنشا، زارداپ شەككەن بالالاردىڭ ءبىرى 1,5 جاستا، ەكىنشىسى – 5 جاستا.
“قايعىلى جاعداي كەزىندە پاتەردە تەك اناسى مەن بالالارى بولعان”، – دەپ ناقتىلادى ۋاكىل.
قازىرگى تاڭدا ۇشەۋىنىڭ دە جاعدايى وتە اۋىر دەپ باعالانۋدا. ءتيىستى ورگاندار تەرگەۋ امالدارىن باستاپ كەتتى. وقيعانىڭ سەبەپتەرى مەن ءمان-جايى انىقتالۋ ۇستىندە.
