فوتو: Manaure Quintero / AFP via Getty Images
سارسەنبى كۇنى كەشكە ۆەنەسۋەلا استاناسى كاراكاستىڭ باتىسىندا ماگنيتۋداسى 7,2 جانە 7,5 بولاتىن ەكى كۇشتى جەر سىلكىنىسى بولدى. سالدارىنان قالادا بىرنەشە عيمارات قيراپ، ماماندار ادام شىعىنى كوپ بولۋى مۇمكىن ەكەنىن بولجاپ وتىر. بۇل تۋرالى BBC جازدى، دەپ حابارلايدى "ادىرنا".
اقش-تىڭ گەولوگيالىق قىزمەتىنىڭ (USGS) مالىمەتىنشە، ەكىنشى جەر سىلكىنىسى العاشقى دۇمپۋدەن ءبىر مينۋتقا جەتەر-جەتپەس ۋاقىت وتكەندە بولعان.
«ادام شىعىنىنىڭ كوپ بولۋى جانە اۋقىمدى زالال كەلۋى ىقتيمال. بۇل اپاتتىڭ سالدارى وتە كەڭ كولەمدە بولۋى مۇمكىن»، – دەپ مالىمدەدى گەولوگيالىق قىزمەت وكىلدەرى.
الدىن الا باعالاۋعا سايكەس، قازا تاپقاندار سانى 10 مىڭنان 100 مىڭ ادامعا دەيىن جەتۋى مۇمكىن. ازىرگە ۆەنەسۋەلا بيلىگى قازا تاپقاندار مەن زارداپ شەككەندەر سانىنا قاتىستى رەسمي مالىمەت جاريالاعان جوق.
Reuters اگەنتتىگىنىڭ حابارلاۋىنشا، ەلدىڭ ىشكى ىستەر ءمينيسترى ديوسدادو كابەلو مەملەكەتتىك تەلەارنا ەفيرىندە كاراكاستا بىرنەشە عيماراتتىڭ قيراپ قالعانىن مالىمدەدى.
ۆەنەسۋەلا پرەزيدەنتىنىڭ مىندەتىن اتقارۋشى دەلسي رودريگەس ەلدە توتەنشە جاعداي رەجيمى ەنگىزىلگەنىن حابارلادى. سونداي-اق ول جەر سىلكىنىسىنەن كەلگەن زاقىمعا بايلانىستى كاراكاس حالىقارالىق اۋەجايىنىڭ جۇمىسى ۋاقىتشا توقتاتىلعانىن ايتتى.
جەر سىلكىنىسى بولعان ساتتە كوپتەگەن ۆەنەسۋەلالىق ۇيلەرىندە بولعان. سەبەبى بۇل كۇنى ەلدە سيمون بوليۆار اسكەرى يسپان اسكەرلەرىن جەڭىپ، ۆەنەسۋەلانىڭ تاۋەلسىزدىگىنە جول اشقان 1821 جىلعى كارابوبو شايقاسى كۇنى اتاپ وتىلگەن.
كاراكاستىڭ چاكاو مۋنيتسيپاليتەتىنىڭ باسشىسى گۋستاۆو دۋكە ساەستىڭ ايتۋىنشا، اۋدان اۋماعىندا كەمىندە ەكى عيمارات تولىق قيراعان، تاعى بىرنەشە نىسان قاتتى زاقىمدانعان.
ونىڭ سوزىنشە، ءۇيىندى استىنان 18 ادام قۇتقارىلىپ شىققان. قازىرگى ۋاقىتتا وقيعا ورنىندا 500-دەن استام قۇتقارۋشى جۇمىس ىستەپ، تۇرعىنداردى ەۆاكۋاتسيالاۋ جانە ىزدەستىرۋ-قۇتقارۋ جۇمىسىن جۇرگىزىپ جاتىر.
