رەسەيلىك "اەروفلوت” اۋە كومپانياسىنىڭ اقپاراتتىق جۇيەسىنە حاكەرلىك شابۋىل جاسالىپ، سالدارىنان بىرنەشە وڭىرمەن اۋە بايلانىسى ءۇزىلدى، دەپ حابارلايدى "ادىرنا" ۇلتتىق پورتالى DW باسىلىمىنا سىلتەمە جاساپ.
قيىر شىعىس پەن كالينينگراد وبلىسى “وقشاۋلانعان”. كوپتەگەن جولاۋشى سوچي، مينۆودى جانە شەتەل باعىتتارىنا ساپار شەگە الماي، اۋەجايدا قالىپ قويعان.
“اەروفلوت” رەيستەردىڭ ءبىر بولىگى كەيىنگە شەگەرىلىپ، كەيبىر باعىتتاردان مۇلدە باس تارتقانىن ءمالىم ەتتى. كومپانيا جولاۋشىلارعا رەسمي سايت پەن اۋەجاي تابلولارىنان اقپاراتتى ءجيى تەكسەرىپ وتىرۋدى ۇسىندى.
شابۋىلعا جاۋاپكەرشىلىكتى Silent Crow اتتى حاكەرلىك توپ ءوز موينىنا الدى. رەسەيلىك “كوممەرسانت” دەرەگىنشە، بۇل توپ بەلارۋستىك “كيبەرپارتيزانى BY” ۇيىمىمەن بىرىگىپ، 2024 جىلدىڭ شىلدەسىنەن بەرى “اەروفلوتتىڭ” كورپوراتيۆتىك جەلىسىنە كىرىپ، 12 تەرابايت دەرەكتى كوشىرىپ العان. ولار كومپانيانىڭ 7 مىڭعا جۋىق فيزيكالىق جانە ۆيرتۋالدىق سەرۆەرىن جويعانىن مالىمدەدى.
Silent Crow مالىمەتىنشە، ولار ءبىر جىل بويى جاسىرىن تۇردە جەلى ىشىندە جۇمىس ىستەپ، اۋە تاسىمالدارى، تىڭداۋ قۇرىلعىلارى، قىزمەتكەرلەردى باقىلاۋ جۇيەلەرىنەن دەرەكتەر العان.
حاكەرلەردىڭ ايتۋىنشا، بۇل شابۋىل “اەروفلوتقا” ستراتەگيالىق دەڭگەيدە زالال كەلتىرگەن، ال جۇيەنى قالپىنا كەلتىرۋ ونداعان ميلليون دوللارعا ءتۇسۋى مۇمكىن.
وسى شابۋىلدان كەيىن “اەروفلوت” قانا ەمەس، ونىڭ ەنشىلەس كومپانيالارى – “روسسيا” مەن “پوبەدا” دا 100-دەن استام رەيستەن باس تارتتى. شەرەمەتەۆو اۋەجايىنان استانا، تاشكەنت، مينسك، ەرەۆان باعىتتارىنداعى حالىقارالىق رەيستەر دە توقتاتىلدى.
قازاقستان كولىك مينيسترلىگى بۇل جاعدايعا قاتىستى تۇسىنىكتەمە بەرىپ، “اەروفلوتتىڭ” “ماسكەۋ – استانا – ماسكەۋ” رەيسى تەحنيكالىق سەبەپتەرمەن ورىندالماعانىن حابارلادى. جولاۋشىلارعا حابارلاما جىبەرىلگەن. بۇل ماسەلە ۆەدومستۆونىڭ ەرەكشە باقىلاۋىندا.
رەسەي باس پروكۋراتۋراسى شابۋىلعا بايلانىستى قىلمىستىق كودەكستىڭ 272-بابى بويىنشا ءىس قوزعادى. ماسكەۋ كولىك پروكۋراتۋراسى 140-تان استام رەيستىڭ توقتاۋىن جەكە باقىلاۋعا العان.
مامانداردىڭ ايتۋىنشا، بۇل وقيعا ءىرى كومپانيالاردىڭ كيبەرقاۋىپسىزدىككە سالعىرت قاراۋىنىڭ سالدارى بولۋى مۇمكىن. Silent Crow توبى بۇعان دەيىن دە رەسەي مەن بەلارۋستىڭ مەملەكەتتىك ءىت-جۇيەلەرىنە شابۋىل جاساعانىن مالىمدەگەن.
سونىمەن قاتار، رەسەي اۆياتسياسىنا قارسى بىرنەشە باعىتتان سوققى جاسالۋدا. حالىقارالىق سانكتسيالار اياسىندا ۇشاقتار مەن قوسالقى بولشەكتەردى ساتۋعا تىيىم سالىنعان. بۇعان قوسا، دروندار شابۋىلىنا بايلانىستى ماسكەۋدە جانە وزگە وڭىرلەردە رەيستەر ءجيى توقتاتىلادى.
ماماندار بۇل جاعدايدىڭ ءالى دە بىرنەشە كۇنگە جالعاسۋى مۇمكىن ەكەنىن ەسكەرتۋدە. ال “اەروفلوت” قازىرگى ۋاقىتتا ءوز ءىت-ينفراقۇرىلىمىن قالپىنا كەلتىرۋمەن اينالىسىپ جاتىر.
