ۆەتنامدىق SOVICO Group كومپانياسى قازاقستانداعى اۋەجايلاردىڭ ءبىرىن باسقارۋعا الۋدى قاراستىرىپ جاتىر. بۇل تۋرالى 6 مامىردا پرەمەر-ءمينيستردىڭ ورىنباسارى سەرىك جۇمانعارين استانادا قازاقستان پرەزيدەنتى قاسىم-جومارت توقاەۆ پەن ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لاممەن بولاتىن كەزدەسۋ قارساڭىندا ايتتى، دەپ حابارلايدى “ادىرنا” ۇلتتىق پورتالى.
"ۆەتنام – وڭتۇستىك-شىعىس ازياداعى ەڭ ءىرى سەرىكتەستەرىمىزدىڭ ءبىرى. 2023 جىلى تاۋار اينالىمى شامامەن 1 ميلليارد دوللاردى قۇرادى. كەيىن وبەكتيۆتى سەبەپتەرگە بايلانىستى ءبىراز تومەندەدى. سوڭعى جىلدى 879 ميلليون دوللارمەن اياقتادىق. ءبىز نەگىزىنەن ۆەتنامعا جارتىلاي فابريكاتتاردى – مىرىش پەن قورعاسىندى كوپ مولشەردە ەكسپورتتايمىز. ال ولاردان تۇرمىستىق تەحنيكا مەن وڭدەلگەن تاۋارلاردى الامىز. ايتا كەتۋ كەرەك، ۆەتنامدا بۇل سالا جاقسى دامىعان", – دەدى ول.
ول ۆەتنامنىڭ يندۋستريالدى ايماقتارىن ارالاپ، ولاردىڭ دامۋ دەڭگەيىن باعالاعانىن اتاپ ءوتتى.
"وندا جاپوندىق، وڭتۇستىككورەيالىق كومپانيالار جۇمىس ىستەيدى، ولار ءوز وندىرىستەرىن قۇرعان جانە جاعدايلارى وتە جاقسى. ءبىز ولاردان كوپ نارسە ۇيرەنۋىمىز كەرەك. بىراق، جالپى ايتقاندا، سوناۋ كەزدەردەن بەرى ءبىزدىڭ ىنتىماقتاستىعىمىز وتە جاقسى دامىپ كەلەدى. سىزدەر بىلەسىزدەر، قازاقستان پرەزيدەنتىنىڭ ۆەتنامعا ساپارى بارىسىندا ۆەتنامدىق SOVICO Group كومپانياسى بىزدەن Qazaq Air اۋە كومپانياسىن ساتىپ الدى. ول مۇندا داميدى. جاقىندا ولار تاعى دا كەلدى، مەن ولارمەن كەزدەستىم. سونىمەن قاتار، ولار اۋەجايدى ساتىپ الۋ ماسەلەسىن قاراستىرىپ جاتىر، سەبەبى اۋە كومپانياسىنا بازالىق اۋەجاي قاجەت. بۇل كومپانيا وتە ۇلكەن، قارقىندى دامىپ كەلە جاتىر جانە حالىقارالىق كومپانيالارمەن كوپتەگەن كەلىسىمشارتتار جاساۋدا. بۇل جاعدايدا ۇلكەن جۇمىستار جاسالماق", – دەپ ءتۇسىندىردى جۇمانعارين.
