قازاقستان رەسپۋبليكاسى — جاھاندىق بەيبىتشىلىك پەن قاۋىپسىزدىكتى نىعايتۋ جولىندا ەرەكشە كوزقاراس پەن باتىل قادامدار جاساعان مەملەكەت. تاريحقا كوز جۇگىرتسەك، تاۋەلسىزدىك جىلدارى ەلىمىز حالىقارالىق باستامالاردى كوتەرىپ، الەم ەلدەرى اراسىنداعى ىنتىماقتاستىقتى كۇشەيتۋگە ءوز ۇلەسىن قوسىپ كەلەدى.
قازاقستاننىڭ بەيبىتشىلىك جولىنداعى العاشقى ءارى ەڭ ماڭىزدى قادامى — 1991 جىلى سەمەي يادرولىق سىناق پوليگونىن جابۋى بولعان. سەمەيدە كەڭەس وداعى كەزىندە 450-دەن استام يادرولىق جارىلىس جاسالىپ، جۇزدەگەن مىڭ ادام زارداپ شەكتى. قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ پوليگوندى جابۋ تۋرالى شەشىمى حالىقارالىق قاۋىمداستىقتا ۇلكەن رەزونانس تۋدىرىعان.
ناتيجەسىندە 2006 جىلى قازاقستاننىڭ باستاماسىمەن ورتالىق ازيادا يادرولىق قارۋدان ازات ايماق قۇرۋ تۋرالى كەلىسىمگە قول قويىلدى. بۇل ايماققا قازاقستانمەن قاتار قىرعىزستان، وزبەكستان، تاجىكستان جانە تۇرىكمەنستان كىردى.
سونىمەن قاتار، 2017 جىلدان باستاپ قازاقستان سيرياداعى ازاماتتىق سوعىستى رەتتەۋگە باعىتتالعان كەلىسسوزدەر ءۇشىن بەيتاراپ الاڭ ۇسىندى.
رەسەي، تۇركيا جانە يران سىندى نەگىزگى تاراپتاردىڭ قاتىسۋىمەن وتكەن استانا پروتسەسى سيريا ماسەلەسىنە قاتىستى كەلىسسوزدەردىڭ ءتيىمدى فورماتىنا اينالدى. بىرنەشە راۋندتان كەيىن تاراپتار «دەەسكالاتسيا ايماقتارىن» قۇرۋعا كەلىستى. بۇل شەشىم قاقتىعىستاردىڭ باسەڭدەۋىنە جانە بەيبىت تۇرعىنداردىڭ قاۋىپسىزدىگىن قامتاماسىز ەتۋگە ىقپال ەتتى.
قازاقستاندا ءتۇرلى مادەنيەتتەر مەن دىندەردىڭ بەيبىت قاتار ءومىر ءسۇرۋى مۇمكىن ەكەنىن ءىس جۇزىندە دالەلدەگەن. 2003 جىلدان بەرى استانادا ەكى جىلدا ءبىر رەت الەمدىك جانە ءداستۇرلى دىندەر كوشباسشىلارىنىڭ سەزى وتكىزىلىپ كەلەدى. بۇل فورۋم ءدىن وكىلدەرى مەن ساياساتكەرلەر اراسىنداعى ديالوگتى نىعايتۋعا باعىتتالعان. اتاپ ايتقاندا، 2022 جىلى وتكەن VII سەزگە پاپا فرانتسيسك پەن يسلام، يۋدايزم، بۋدديزم، يندۋيزم وكىلدەرى قاتىسىپ، كونفەسسياارالىق تاتۋلىقتى ساقتاۋ تۋرالى بىرلەسكەن ۇندەۋ قابىلدادى.
قازاقستاندا بەيبىتشىلىك ورناتۋدا تەك ساياسي باستامالار مەن ءىس-قيمىلدار جۇزەگە اسادى. 2018 جىلى وتاندىق اسكەري قىزمەتكەرلەر ليۆانداعى بۇۇ-نىڭ ۋاقىتشا كۇشتەرى قۇرامىندا قىزمەت اتقارا باستادى. سوعان ساي 120-دان استام قازاقستاندىق بىتىمگەر ليۆاننىڭ وڭتۇستىگىندە پاترۋل جۇرگىزۋ، جەرگىلىكتى حالىققا گۋمانيتارلىق كومەك كورسەتۋ سياقتى تاپسىرمالاردى ورىنداپ كەلەدى.
