استانا قالاسىنداعى «نۇرسۇلتان نازارباەۆ» حالىقارالىق اۋەجايىنىڭ حالىقارالىق تەرمينالىندا 27 شىلدە كۇنى كەشكى ساعات 19:36-دا سۋ تاسقىنىنا ۇلاسقان توتەنشە جاعداي ورىن الدى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىلەردە تاراعان ۆيدەولاردا سۋدىڭ قۇبىردان قاتتى قىسىممەن اتقىلاپ، اينالانى تۇگەل سۋ باسقانى، ءتىپتى قابىرعا قاپتاماسىنىڭ اراسىنان دا سۋ شىققانىن بايقاۋعا بولادى.
وقيعانىڭ ناقتى سەبەبى — ءبىرىنشى قاباتتاعى نوسەر سۋىن اعىزاتىن قۇبىردىڭ زاقىمدانۋى. اۋەجايدىڭ ءباسپاسوز قىزمەتىنىڭ مالىمەتىنشە، ماماندار بار بولعانى 12–20 مينۋت ىشىندە اقاۋدى قالپىنا كەلتىرىپ، جاعدايدى باقىلاۋعا العان.
اتالعان وقيعا اۋەجاي جۇمىسىنا اسەر ەتپەدى — رەيستەردىڭ كەشىگۋى دە، توقتاتىلۋى دا تىركەلگەن جوق. قازىرگى ۋاقىتتا اۋەجاي شتاتتىق رەجيمدە جۇمىس ىستەۋدە.
