قازاقستان ىشكى ىستەر مينيسترلىگىنە قاراستى قىلمىستىق-اتقارۋ جۇيەسى كوميتەتى سوتتالعان سۋپەرمارافونشى مارات جىلانباەۆتىڭ دەنساۋلىعى قاناعاتتانارلىق جاعدايدا ەكەنى تۋرالى اقپارات تاراتتى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
«جىلانباەۆ سوت ۇكىمىمەن كەلىسپەگەندىكتەن، تاماقتان باس تارتاتىنىن مالىمدەگەن. الايدا بەينەباقىلاۋ كامەرالارىنداعى جازبالارعا سايكەس، ول سۋ، شاي جانە كومپوت ءىشىپ، تاڭەرتەڭ دەنە جاتتىعۋلارىن جاساپ ءجۇر. دەنساۋلىق جاعدايى – قاناعاتتانارلىق. ول مەديتسينالىق قىزمەتكەرلەردىڭ تۇراقتى باقىلاۋىندا. باق-تا تاراعان ونىڭ سالماعى 45 كەلى دەگەن اقپارات شىندىققا جاناسپايدى»، – دەلىنگەن رەسمي ورگان تاراتقان حابارلامادا.
ۆەدومستۆونىڭ مالىمەتىنشە، جىلانباەۆ قاج دەپارتامەنتى باسشىلىعىمەن، قاداعالاۋ ورگاندارى جانە ادام قۇقىقتارىن قورعاۋ ۇيىمدارى وكىلدەرىمەن بىرنەشە مارتە جەكە قابىلداۋدا بولعان. سونداي-اق وعان ادام قۇقىقتارى جونىندەگى ۋاكىلدەن رەسمي ءتۇسىندىرۋ حاتى جولدانعان. ودان ەشقانداي ارىز-شاعىم تۇسپەگەن.
مارات جىلانباەۆ – 62 جاستاعى قازاقستاندىق مارافونشى، ۋلترامارافون جارىستارىنىڭ جەڭىمپازى ءارى جۇلدەگەرى. ول جەتى بىردەي گيننەستىڭ رەكوردتار كىتابىنا ەنگەن الەمدىك رەكورد ورناتقان. ازيا، افريكا، اۆستراليا جانە امەريكا قۇرلىقتارىندا جۇگىرىپ وتكەن جەر بەتىندەگى جالعىز ادام.
ساياسي بەلسەندىلىگىمەن دە تانىمال بولعان جىلانباەۆ ءماجىلىس دەپۋتاتتىعىنا كانديدات بولىپ، وپپوزيتسيالىق پارتيا قۇرۋعا تالپىنعان.
2023 جىلدىڭ قاراشاسىندا استانا قالاسىنىڭ قىلمىستىق ىستەر جونىندەگى اۋدانارالىق سوتى ونى «تىيىم سالىنعان ەكسترەميستىك ۇيىمدى قارجىلاندىردى جانە ونىڭ جۇمىسىنا قاتىستى» دەگەن ايىپپەن 7 جىلعا باس بوستاندىعىنان ايىرىپ، 3 جىل قوعامدىق-ساياسي قىزمەتپەن اينالىسۋعا تىيىم سالۋ جازاسىن تاعايىنداعان. سوت پروتسەسى جابىق جاعدايدا وتكەن.
ەسكە سالايىق، بۇعان دەيىن دە قۇقىق قورعاۋشى باقىتجان تورەعوجينا مارات جىلانباەۆتىڭ ەسى كىرەسىلى-شىعاسىلى كۇيدە جاتقانىن حابارلاعان ەدى.
