بۇزاقىلىق ءۇشىن دەگەن ايىپپەن 15 تاۋلىككە قامالعان قارجاۋباي نۇرىموۆقا اپەللياتسيالىق سوتتىڭ شەشىمى شىقتى، دەپ حابارلايدى “ادىرنا” ۇلتتىق پورتالى.
الماتى وبلىسىنىڭ اكىمشىلىك ىستەر جونىندەگى سوت القاسى ءبىرىنشى ساتىداعى قاۋلىنى وزگەرىسسىز قالدىردى. ياعني، قارجاۋباي ادۆوكاتتارىنىڭ شاعىمىن قاناعاتتاندىرمادى. بۇل قارجاۋباي نۇرىموۆ قاماۋدا 15 كۇن وتكىزەتىنىن بىلدىرەدى. قارجاۋبايدىڭ ادۆوكاتتارى ەر ادامنىڭ وتباسىلىق جاعدايلارعا بايلانىستى قاتتى ەموتسيونالدى تولقۋدى باستان وتكەرگەنىن ەسكەرۋدى سۇراعان. الايدا سوت شەشىمى وزگەرىسسىز قالدى.
اۋىرلاتاتىن ءمان - جايلار بولماعان جانە جەڭىلدەتەتىن جاعدايلار بولعان كەزدە، وسى قۇقىق بۇزۋشىلىق ءۇشىن كوزدەلگەن ەڭ جوعارى جازا قولدانىلدى. بۇل جاعدايدا 15 تاۋلىك مەرزىمگە قاماۋعا الۋ ءىستىڭ ءمان-جايلارىن ەسكەرە وتىرىپ، تىم قاتال جانە تەپە-تەڭ ەمەس، دەلىنگەن شاعىم قۇجاتىندا
جەڭىلدەتەتىن جاعدايلار رەتىندە مىنالار كەلتىرىلدى:
- ۇلىنىڭ قازاسى;
- تۋعان ءىنىسىنىڭ قايتىس بولۋى;
- مۇلىكتى (تۇرعىن ءۇيدى) جانىپ كەتۋى;
- بۇقارالىق اقپارات قۇرالدارىنىڭ تۇراقتى نازارى;
- ۇلىنىڭ قازاسىنا قاتىستى قىلمىستىق ءىس بويىنشا تەرگەۋ ارەكەتتەرىنە كۇندەلىكتى قاتىسۋ.
ەسكە سالا كەتەيىك، قاماۋعا الىنعان نۇرىموۆتىڭ جاعدايى جاقسارماعان سوڭ شۇعىل تۇردە ەڭبەكشىقازاق كوپسالالى اۋدانارالىق اۋرۋحاناسىنا جەتكىزىلگەن.
سونداي-اق، الماتى وبلىسىنىڭ پوليتسيا دەپارتامەنتى ونىڭ ءىنىسى نۇرقانات عايىپباەۆتىڭ قازاسىنا بايلانىستى سوت-مەديتسينالىق ساراپتاماسىنىڭ الدىن-الا بولجامىن جاريالاعان ەدى. ونداعى جەكە مالىمەتتەردى كوپشىلىككە جاريالاۋعا مارقۇمنىڭ جانۇياسى رۇقسات ەتپەگەن. نۇرقاناتتىڭ قازاسىنا وراي پوليتسيا تاراتقان مالىمەتتەر ءولىمنىڭ سەبەبىن مارقۇمننىڭ وزىنەن ىزدەستىرۋ باعىتىندا بولعان. مۇنىڭ الدىندا قارجاۋباي نۇرىموۆتىڭ ۇلى شەرزات بولات دۇكەندە جانجال تۋدىرعان قاسكۇنەمدەر قولىنان قازا تاپقان. كۇدىكتىلەر ۇستالىپ، تەرگەۋ ءجۇرىپ جاتىر.
