دەنساۋلىق ساقتاۋ مينيسترلىگىنىڭ بۇرىنعى باسشىسى ەلجان ءبىرتانوۆ پەن ونىڭ ورىنباسارى ولجاس ابىشەۆتىڭ ىسىنە قاتىستى سوت تەرگەۋى اياقتالىپ، ولار قورىتىندى ءسوز سويلەدى، دەپ حابارلايدى ”ادىرنا” ۇلتتىق پورتالى قازاقپاراتقا سىلتەمە جاساپ.
اتالعان پروتسەسس «Zoom» پلاتفورماسىندا ونلاين رەجيمدە ءوتتى. وندا العاش بولىپ ءسوز العان ەكس-دەنساۋلىق ساقتاۋ ۆيتسە-ءمينيسترى ولجاس ابىشەۆ وزىنە تاعىلعان ايىپتاردىڭ دايەكسىز ەكەنىن العا تارتىپ، تولىق اقتاۋدى سۇرادى.
«قۇرمەتتى سوت جانە اتالعان پروتسەسكە قاتىسۋشىلار! مەن بۇرىن ايتقانىمداي، ءوزىمدى كىنالىمىن دەپ ەسەپتەمەيمىن. مەنى اتا-انام ارقاشان زاڭعا باعىنۋعا ۇيرەتتى. بۇل مەنىڭ وتباسىمنىڭ نەگىزگى تاربيە وزەگى بولدى.
تەرگەۋ بارىسىندا بارلىق سۇراقتارعا ناقتى ءارى انىق جاۋاپ بەرە ءبىلدىم. ماعان تاعىلعان ايىپتار ويدان شىعارىلعان، دالەلسىز جانە ولار قارجىلىق مونيتورينگ اگەنتتىگىنىڭ قيالىنان تۋعان. ءبىزدىڭ پروكۋرورلار دا شىندىققا كەلگەندە سوقىر، ساڭىراۋ. ايىپتاۋشى جاقتىڭ ءىت تەحنولوگيالاردان حابارى جوق. پروكۋراتۋرا ءىس قوزعالىپ وتىرعان ەلەكتروندى پلاتفورمانىڭ قالاي جۇمىس ىستەيتىنىن دە بىلمەيدى.
مەن ءوزىمنىڭ كىنالى ەمەس ەكەنىمدى دالەلدەۋ ءۇشىن سوڭىنا دەيىن بارامىن جانە مەنى تولىق اقتاۋدى سۇرايمىن»، – دەدى ولجاس ابىشەۆ.
كەلەسى بولىپ قورىتىندى ءسوز سويلەگەن دەنساۋلىق ساقتاۋ مينيسترلىگىنىڭ ەكس-باسشىسى ەلجان ءبىرتانوۆ بۇعان دەيىنگى سوت وتىرىستارىندا ءوزىنىڭ كىناسىزدىگىن ايعاقتايتىن ناقتى دالەلدەر ۇسىنعانىن اتاپ ءوتتى.
«سوت تەرگەۋى كۇردەلى ءارى كۇيزەلىس جاعدايىندا وتكەنىمەن، ءبىز بۇل ءىستىڭ اقتىق كەزەڭىنە جەتىپ وتىرمىز. وسى كەزگە دەيىن بارلىق دالەلدەردى ۇسىندىق، كۋاگەرلەردى تىڭدادىق، ايىپتاۋ اكتىسىن دە ەستىدىك. ونىڭ ناتيجەسىندە مەملەكەتتىك ايىپتاۋشى ورگان ماعان جانە ولجاس ابىشەۆكە تاعىلعان كىنانى دالەلدەي الماعانىن كوردىك. ءبىزدىڭ جالعىز قىلمىسىمىز – جاقسى مەملەكەتتىك قىزمەتكەر بولۋعا تالپىنعان نيەتىمىز دەپ بىلەمىن.
ەلەكتروندى پلاتفورمانىڭ بار ەكەنى، اقشانىڭ قايدا جۇمسالعانى انىق. جاعدايدىڭ قالاي وربىگەنى دە بارشاعا ايقىن. سانيتارلىق اۆياتسيا بويىنشا دا سولاي. مەن ويىمشا، جەتكىلىكتى دالەلدەر كەلتىردىم جانە بۇل ىستە مەن ەشقانداي جەكە باستىڭ پايداسىن كوزدەمەدىم.
قۇرمەتتى سوت، كەڭەسۋ بولمەسىندە ءسىز ءبىزدىڭ تاراپ ۇسىنعان بارلىق دالەلدەردى سارالاپ، مەملەكەتتىك ايىپتاۋشى تاراپ تاققان زاڭسىز دايەكتەردى وبەكتيۆتى تۇردە باعالاپ، مەنى جانە ولجاس ابىشەۆتى كىناسىز دەپ تانيسىز دەپ ۇمىتتەنەمىن. ءبىز قىلمىسكەر ەمەسپىز، زاڭدى بۇزعان جوقپىز»، – دەپ ءسوزىن تۇيىندەدى ەلجان ءبىرتانوۆ.
سۋديانىڭ ايتۋىنشا، سوت ۇكىمى شىعاتىن ۋاقىت الدىن الا بەلگىلەنىپ، وعان ايىپتالۋشىلار مەن ايىپتاۋشى ورگان تاراپىنان 8 ادام شاقىرىلادى. ول پروتسەسس وفلاين رەجيمدە وتەتىن بولادى.
ەسكە سالا كەتسەك، بۇرىنعى دەنساۋلىق ساقتاۋ ءمينيسترى ەلجان ءبىرتانوۆ 2020 جىلدىڭ 3 قاراشاسىندا بيۋدجەت قاراجاتىن ىسىراپ ەتتى دەگەن كۇدىكپەن قاماۋعا الىنعان بولاتىن.
تەرگەۋ ماتەريالى بويىنشا، ەلجان ءبىرتانوۆ پەن ونىڭ ورىنباسارى ولجاس ابىشەۆكە «Ericsson Nicola Tesla» كومپانياسىنىڭ قىزمەتىن قولدانۋ كەزىندە «لاۋازىمدىق وكىلەتىن تەرىس پايدالانۋ» ارقىلى مەملەكەتكە 1,5 ملرد تەڭگە شىعىن كەلتىردى دەگەن ايىپ تاعىلعان.
