قاراعاندى قالاسىندا كارىز قۇدىعىن تازالاۋ كەزىندە ەكى جۇمىسشى قازا تاپتى، دەپ حابارلايدى "ادىرنا" ۇلتتىق پورتالى «كتك» تەلەارناسىنا سىلتەپ.
قايعىلى وقيعا كەزىندە كوممۋنالدىق قىزمەتتىڭ ءتورت جۇمىسشىسى قۇبىر قۇدىعىن تازالاۋ ءۇشىن وقيعا ورنىنا بارعان. العاشقى بولىپ قۇدىققا تۇسكەن جۇمىسشى ەسىنەن تانىپ قۇلاعان. ونى كورگەن ارىپتەسى ارتىنان ءتۇسىپ، كومەك كورسەتۋگە تىرىسقان. الايدا، ەكەۋى دە تۇنشىعىپ، قۇدىقتان شىعا الماي قالدى. ولاردىڭ جاسى — 29 جانە 46 جاستا. ەكەۋى دە تاجىريبەلى ماماندار بولعان: ءبىرى 6 جىل، ەكىنشىسى 24 جىل سلەسار قىزمەتىن اتقارعان.
الدىن الا بولجام بويىنشا، جۇمىسشىلار مەتان گازىنان ۋلانعان. قازىرگى ۋاقىتتا ارنايى كوميسسيا قۇرىلىپ، ەڭبەك ينسپەكتسياسى تەكسەرۋ جۇمىستارىن باستاپ كەتتى. سونىمەن قاتار، پوليتسيا قىلمىستىق ءىس قوزعاپ، تەرگەۋ جۇرگىزىپ جاتىر.
«قاراعاندى سۋ» كومپانياسىنىڭ باس ديرەكتورى ەربول تولەۋوۆ مارقۇمداردىڭ وتباسىنا جان-جاقتى كومەك كورسەتىلەتىنىن ايتتى.
"كومپانيا تاراپىنان قولداۋ بولادى. قايتىس بولعانداردىڭ وتباسىنا جان-جاقتى كومەكتەسەمىز. قازىر تولەنەتىن قاراجاتتىڭ مولشەرىن انىقتاپ جاتىرمىز. بۇل — بىزدە العاش رەت بولعان قايعىلى جاعداي. مارقۇمداردىڭ تۋىستارىنا قايعىرا كوڭىل ايتامىز", — دەدى تولەۋوۆ.
