پرەزيدەنت قاسىم-جومارت توقاەۆ مەديتسينا قىزمەتكەرلەرىنە كۇش قولدانۋعا قاتىستى جازانى قاتاڭداتۋدى تاپسىردى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ كەڭەسشىسى ءارى ءباسپاسوز حاتشىسى رۋسلان جەلدىبايدىڭ مالىمەتىنشە، مەملەكەت باسشىسى پارلامەنت دەپۋتاتتارى، مەديتسينا سالاسىنىڭ وكىلدەرى مەن بەلسەندى ازاماتتاردىڭ دەنساۋلىق ساقتاۋ قىزمەتكەرلەرىنە كۇش كورسەتۋ جانە قاتىگەزدىك تانىتقاندارعا قاتىستى جازانى كۇشەيتۋ جونىندەگى ۇسىنىستارىن قولدايدى.
«پرەزيدەنت ۇكىمەتكە زاڭناماعا ءتيىستى وزگەرىستەر مەن تولىقتىرۋلار ازىرلەۋدى تاپسىردى. بۇل وزگەرىستەر ازاماتتىق قوعام وكىلدەرىنىڭ قاتىسۋىمەن پارلامەنتتە تالقىلاناتىن بولادى»، – دەلىنگەن حابارلامادا.
ەسكە سالايىق، بۇعان دەيىن قاراعاندىدا جەكە كلينيكادا ناۋقاس دارىگەرگە شابۋىل جاساعان بولاتىن. وقيعا مەديتسينالىق مەكەمە ىشىندە بولعان جانە بەينەجازبا الەۋمەتتىك جەلىدە تەز تاراعان.
