اباي وبلىسىندا ۇلى اقىن، ويشىل اباي قۇنانبايۇلىنىڭ 180 جىلدىعى مەن قازاقستان حالقى اسسامبلەياسىنىڭ 30 جىلدىعىنا ارنالعان رەسپۋبليكالىق «اباي وقۋلارى» كەڭ اۋقىمدى ءىس-شارالار لەگى ءوز مارەسىنە جەتتى. ەلىمىزدىڭ تۇكپىر-تۇكپىرىنەن كەلگەن 40-قا جۋىق جاس، ءتۇرلى ەتنوس وكىلدەرى كيەلى اباي جەرىندە باس قوسىپ، جاس ۇرپاقتى دوستىق پەن رۋحاني قۇندىلىقتارعا باۋلىعان مازمۇندى باعدارلاماعا قاتىستى.
فەستيۆال اياسىندا جاستار جيدەبايداعى اباي-شاكارىم كەسەنەلەرىنە، كۇشىكباي اتا مازارىنا، مۇحتار اۋەزوۆتىڭ تۋعان جەرى بورىلىگە بارىپ، ۆيكتورينالارعا، زياتكەرلىك كەزدەسۋلەر مەن مادەني شارالارعا قاتىستى. ءداستۇر مەن تاريحقا نەگىزدەلگەن رۋحاني ساياحات ءاربىر قاتىسۋشىعا ۇمىتىلماس اسەر سىيلادى.
شارا سوڭىندا قاتىسۋشىلار ۇلى اقىننىڭ رۋحىنا تاعزىم ەتىپ، اباي مۋزەيى اۋماعىندا ورنالاسقان «اباي جانە ۇلدارى» ەسكەرتكىشىنە گۇل شوقتارىن قويدى. سالتاناتتى راسىمدە ءسوز سويلەگەن اباي وبلىسى ىشكى ساياسات باسقارماسىنىڭ باسشىسى جارقىن ءجۇمادىلوۆ اباي مۇراسىنىڭ جاستار اراسىندا ناسيحاتتالۋى تۋرالى ايتىپ ءوتتى.
– قۇرمەتتى جاستار، سىزدەردى دانا ابايدىڭ تۋعان توپىراعىندا قارسى الۋ – ءبىز ءۇشىن زور مارتەبە. مەملەكەت باسشىسى جاستاردى قولداۋدى ۇنەمى باسىم باعىت رەتىندە ايتىپ كەلەدى. وسى رەتتە ءبىز جاستارعا ابايدىڭ دانالىعىن، وي تەرەڭدىگىن جانە ادامگەرشىلىك قاعيداتتارىن كەڭىنەن ءتۇسىندىرۋدى ماقسات ەتتىك. سىزدەر وسى وقۋلار ارقىلى ەلىمىزدىڭ ءار وڭىرىنەن كەلگەندەر اراسىنان جاڭا دوستار تاۋىپ، رۋحاني ازىق الدىڭىزدار دەپ سەنەمىن. قاتىسۋعا كەلگەن ارقايسىڭىزعا وبلىس اكىمىنىڭ اتىنان شىنايى العىسىمدى بىلدىرەمىن، – دەدى باسقارما باسشىسى.
قازاقستان حالقى اسسامبلەياسىنىڭ اتىنان ءسوز العان «اسسامبلەيا جاستارى» رقب توراعاسى تيمۋر جۇمۇرباەۆ اباي مۇراسىنىڭ قازىرگى قوعامداعى ماڭىزىنا توقتالدى.
– بۇگىنگى جاستار اباي شىعارماشىلىعىنا قىزىعۋشىلىقپەن قاراپ، ونىڭ يدەيالارىن زاماناۋي تۇرعىدا تۇسىنۋگە تىرىسۋدا. بۇل – ەلىمىزدىڭ رۋحاني جاڭعىرۋىنىڭ ناقتى كورىنىسى. ابايدىڭ ويلارى – ۇلت بىرلىگىنىڭ تىرەگى. جاستاردىڭ وسى جولدا باس قوسۋى – ۇلكەن مانگە يە، – دەدى ول.
شارا بارىسىندا قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆتىڭ ارنايى قۇتتىقتاۋ حاتى وقىلدى. حاتتا ۇلى ويشىل مۇراسىن ناسيحاتتاۋدىڭ ەل بولاشاعى ءۇشىن ماڭىزدىلىعى اتاپ ءوتىلدى.
