“سەمەي ورمانى” فيليالدارىنىڭ بىرىندە "اعاش ۇرلادى" دەگەن كۇدىككە ىلىنگەندەر ۇستالدى، دەپ حابارلايدى "ادىرنا" ۇلتتىق پورتالى Polisia.kz-كە سىلتەپ.
9 شىلدە كۇنى اباي وبلىسىنىڭ اۋماعىندا ءىىم جانە ۇقك جەدەل ۋاكىلدەرى پروكۋراتۋرانىڭ ۇيلەستىرۋىمەن “سەمەي ورمانى” مەملەكەتتىك ورمان تابيعي رەزەرۆاتى فيليالدارىنىڭ بىرىنەن اعاش ۇرلاعان قىلمىستىق توپ ۇستالدى. قىلمىسكەرلەردىڭ فيليال ديرەكتورىنىڭ باسشىلىعىمەن ارەكەت ەتكەنى انىقتالدى.
“ورماندى جىمقىردى دەگەن كۇدىكپەن پوليتسياعا 20-دان استام ادام جەتكىزىلدى. ءتىنتۋ جۇرگىزىلىپ، ۇرلانعان اعاشتاردىڭ ونداعان تەكشە مەترى، اعاش وڭدەۋ ستانوكتارى، اقشا جانە قۇجاتتار تاركىلەندى. فيليال ديرەكتورى مەن قىلمىسقا قاتىسۋشىلار ۋاقىتشا ۇستاۋ يزولياتورىنا قامالدى", – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى.
كۇدىكتىلەردىڭ لاۋازىمدىق وكىلەتتىكتى اسىرا پايدالانۋ، پارا الۋ، مۇلىكتى جىمقىرۋ فاكتىلەرىنە قاتىسى بار-جوعى تەكسەرىلمەك.
