Abai oblysynda ūly aqyn, oişyl Abai Qūnanbaiūlynyŋ 180 jyldyǧy men Qazaqstan halqy Assambleiasynyŋ 30 jyldyǧyna arnalǧan respublikalyq «Abai oqulary» keŋ auqymdy ıs-şaralar legı öz märesıne jettı. Elımızdıŋ tükpır-tükpırınen kelgen 40-qa juyq jas, türlı etnos ökılderı kielı Abai jerınde bas qosyp, jas ūrpaqty dostyq pen ruhani qūndylyqtarǧa baulyǧan mazmūndy baǧdarlamaǧa qatysty.
Festival aiasynda jastar Jidebaidaǧy Abai-Şäkärım kesenelerıne, Küşıkbai ata mazaryna, Mūhtar Äuezovtıŋ tuǧan jerı Börılıge baryp, viktorinalarǧa, ziiatkerlık kezdesuler men mädeni şaralarǧa qatysty. Dästür men tarihqa negızdelgen ruhani saiahat ärbır qatysuşyǧa ūmytylmas äser syilady.
Şara soŋynda qatysuşylar ūly aqynnyŋ ruhyna taǧzym etıp, Abai muzeiı aumaǧynda ornalasqan «Abai jäne ūldary» eskertkışıne gül şoqtaryn qoidy. Saltanatty räsımde söz söilegen Abai oblysy Işkı saiasat basqarmasynyŋ basşysy Jarqyn Jūmadılov Abai mūrasynyŋ jastar arasynda nasihattaluy turaly aityp öttı.
– Qūrmettı jastar, sızderdı dana Abaidyŋ tuǧan topyraǧynda qarsy alu – bız üşın zor märtebe. Memleket basşysy jastardy qoldaudy ünemı basym baǧyt retınde aityp keledı. Osy rette bız jastarǧa Abaidyŋ danalyǧyn, oi tereŋdıgın jäne adamgerşılık qaǧidattaryn keŋınen tüsındırudı maqsat ettık. Sızder osy oqular arqyly elımızdıŋ är öŋırınen kelgender arasynan jaŋa dostar tauyp, ruhani azyq aldyŋyzdar dep senemın. Qatysuǧa kelgen ärqaisyŋyzǧa oblys äkımınıŋ atynan şynaiy alǧysymdy bıldıremın, – dedı basqarma basşysy.
Qazaqstan halqy Assambleiasynyŋ atynan söz alǧan «Assambleia jastary» RQB töraǧasy Timur Jūmūrbaev Abai mūrasynyŋ qazırgı qoǧamdaǧy maŋyzyna toqtaldy.
– Bügıngı jastar Abai şyǧarmaşylyǧyna qyzyǧuşylyqpen qarap, onyŋ ideialaryn zamanaui tūrǧyda tüsınuge tyrysuda. Būl – elımızdıŋ ruhani jaŋǧyruynyŋ naqty körınısı. Abaidyŋ oilary – ūlt bırlıgınıŋ tıregı. Jastardyŋ osy jolda bas qosuy – ülken mänge ie, – dedı ol.
Şara barysynda Qazaqstan halqy Assambleiasy Töraǧasynyŋ orynbasary Marat Äzılhanovtyŋ arnaiy qūttyqtau haty oqyldy. Hatta ūly oişyl mūrasyn nasihattaudyŋ el bolaşaǧy üşın maŋyzdylyǧy atap ötıldı.
