قازاقستاندىق Shoqan School مەكتەبىنىڭ ءۇش وقۋشىسى الەمنىڭ ەڭ بەدەلدى ۋنيۆەرسيتەتتەرى – گارۆارد پەن كاليفورنيا ۋنيۆەرسيتەتى بەركليگە (UC Berkeley) وقۋعا قابىلداندى، دەپ حابارلايدى “ادىرنا” ۇلتتىق پورتالى قازتاگ-قا سىلتەپ.
سابىرجان ارمان ەسىمدى وقۋشى گارۆارد ۋنيۆەرسيتەتىنىڭ كومپيۋتەرلىك ينجەنەريا باعدارلاماسىنا تولىق گرانتپەن وقۋعا ءتۇستى. وسپان توميريس – گارۆاردتىڭ ەكونوميكا فاكۋلتەتىنە، ال جاندىلداەۆا كاميللا – UC Berkeley ۋنيۆەرسيتەتىنىڭ Management, Entrepreneurship, and Technology (MET) اتتى ەرەكشە باعدارلاماسىنا قابىلداندى. ايتا كەتەيىك، بيىل بۇل باعدارلاماعا 127 مىڭ ادام ءوتىنىش بەرىپ، تەك 200 ۇمىتكەر عانا ىرىكتەلىپ الىنعان. سونداي-اق، ارۋجان اسىل ۇلىبريتانياداعى ەڭ ۇزدىك Foundation باعدارلامالارىنىڭ بىرىنە – University College London-عا ءتۇستى.
Shoqan School نەگىزىن قالاۋشىلار – كاسىپكەر كەڭەس راقىشەۆ پەن ەكولوگ اسەل تاسماعامبەتوۆا – مەكتەپ وقۋشىلارىنا جالپى سوماسى 173 ميلليون تەڭگەدەن استام ستيپەنديا بولگەن. ال الەمنىڭ ۇزدىك 10 ۋنيۆەرسيتەتىنە تۇسكەن تۇلەكتەردىڭ وقۋ اقىسىن ءوز قالتالارىنان تولىقتاي وتەۋدى شەشكەن.
