وزبەكستان پرەزيدەنتى شاۆكات ميرزيوەۆ مەملەكەتتىك باسقارۋ جۇيەسىنىڭ تيىمدىلىگىن ارتتىرۋ ماقساتىندا جاڭا جارلىققا قول قويدى. بۇل تۋرالى مەملەكەت باسشىسىنىڭ ءباسپاسوز حاتشىسى شەرزود اسادوۆ مالىمدەدى، دەپ حابارلايدى «ادىرنا» ءتىلشىسى.
جارلىققا سايكەس، پرەزيدەنت اكىمشىلىگى مەن وعان باعىنىشتى قۇرىلىمداردا شتات سانى وڭتايلاندىرىلىپ, 284 لاۋازىم قىسقارتىلدى. ودان بولەك، قايتالاناتىن قىزمەتتەر جويىلىپ، فۋنكتسيالار قايتا ءبولىندى. بۇل شەشىم «مەملەكەتتىك باسقارۋ جۇيەسىندە تيىمدىلىكتى، بەلسەندىلىكتى جانە ناتيجەلىلىكتى ارتتىرۋ شارالارى تۋرالى» پرەزيدەنت جارلىعىمەن بەكىتىلدى.
قۇجاتتا اكىمشىلىك جۇمىسىنىڭ ءبىلىم بەرۋ، دەنساۋلىق ساقتاۋ، سۋ رەسۋرستارى، ستراتەگيالىق دامۋ جانە سىرتقى ساياسات سىندى بەس باسىم باعىتى كورسەتىلگەن. وسى سالالارداعى رەفورمالاردى ءتيىمدى جۇزەگە اسىرۋ ءۇشىن پرەزيدەنت اكىمشىلىگىنىڭ قۇرىلىمىنا بەس باسشىنىڭ ورىنباسارى لاۋازىمى ەنگىزىلدى.
سونىمەن قاتار ستراتەگيالىق دامۋ جانە سىرتقى ساياسات جونىندەگى جاڭا كەڭەسشى لاۋازىمدارى قۇرىلدى. قارجىلىق تەحنولوگيالار، تسيفرلاندىرۋ مەن جاساندى ينتەللەكت، كرەاتيۆتى ەكونوميكا مەن تۋريزم، قوعامدىق قاۋىپسىزدىك پەن زاڭ ۇستەمدىگى سالالارىنا جاۋاپتى دەپارتامەنتتەر اشىلدى. ودان بولەك، ايماقتىق ساپارلار مەن جينالىستارعا دايىندىق، اناليتيكالىق ماتەريال ازىرلەۋ جانە كوممۋنيكاتسيا باعىتىندا جاڭا بولىمشەلەر جۇمىسىن باستايدى.
ميرزيوەۆتىڭ مەملەكەتتىك باسقارۋ جۇيەسىن رەفورمالاۋ جونىندەگى جاڭا جارلىعى اياسىندا اقپارات جانە بۇقارالىق كوممۋنيكاتسيالار اگەنتتىگى تاراتىلىپ، ونىڭ نەگىزىندە ۇلتتىق كونتەنت ءوندىرۋ ورتالىعى قۇرىلاتىن بولدى.
جارلىقتا كورسەتىلگەندەي، ەندى بارلىق نورماتيۆتىك-قۇقىقتىق اكتى مەن جوبالار پرەزيدەنت اكىمشىلىگى جانىنداعى اناليتيكالىق ينستيتۋتتاردىڭ عىلىمي زەرتتەۋلەرىنە سۇيەنە وتىرىپ, وتاندىق جانە شەتەلدىك ساراپشىلاردىڭ ۇسىنىستارىن ەسكەرۋ ارقىلى ازىرلەنەتىن بولادى. باسىم باعىتتاردى جۇزەگە اسىرۋ ارنايى جوبالىق وفيستەر ارقىلى ىسكە اسىرىلادى.
ەسكە سالايىق، 2024 جىلدىڭ جەلتوقسانىندا وزبەكستاندا جۇمىسقا جاۋاپسىزدىعى مەن سالعىرتتىعى ءۇشىن شارۋاشىلىق كەشەنىنىڭ 297 باسشىسى جۇمىستان بوساتىلعان ەدى.
