بۇگىن، 14 شىلدەدە ۇلى وتان سوعىسىنىڭ ارداگەرى، «حالىق قاھارمانى» ابدىعالي قايمولدين 105 جاسقا قاراعان شاعىندا دۇنيەدەن وزدى، دەپ حابارلايدى «ادىرنا» ءتىلشىسى.
مەملەكەت باسشىسى قاسىم-جومارت توقاەۆ مارقۇمنىڭ وتباسىنا كوڭىل ايتۋ جەدەلحاتىن جولدادى.
«ابدىعالي قايمولدين جاستاي مايدان دالاسىنا اتتانىپ، ەرەن ەرلىگىمەن جەڭىستى جاقىنداتۋعا زور ۇلەس قوسقان باتىر تۇلعا بولدى. بەيبىت كەزەڭدە مەملەكەتتىك جانە قوعامدىق ىستەرگە بەلسەنە ارالاسىپ، ەل يگىلىگى جولىندا ۇزاق جىل قىزمەت ەتتى. عاسىر جاساپ، سوڭىنا ونەگەلى جول قالدىرعان ابدىعالي قايمولديننىڭ جارقىن بەينەسى مەن ەسىمى ۇمىتىلمايدى. يمانى سالامات، جانى جانناتتا بولسىن»، – دەپ جازىلعان جەدەلحاتتا.
ايتا كەتەيىك، ابدىعالي قايمولدين 1921 جىلى 30 ماۋسىمدا اباي وبلىسىنىڭ ابىرالى اۋىلىندا دۇنيەگە كەلگەن. سوعىستىڭ العاشقى جىلى-اق مايدانعا اتتانعان. ول تانككە قارسى ارتيللەريادا زەڭبىرەكشى، وقتاۋشى، كەيىننەن كوماندير بولعان. مارشال ا.م. ۆاسيلەۆسكيدىڭ باسشىلىعىمەن 1-ءشى ۋكراينا، 3-ءشى بەلارۋس، بالتىق جاعالاۋى مايداندارى مەن حاركوۆتى ازات ەتۋ سوعىسىنا قاتىسقان. كەيىننەن مايدان شەبىندەگى ەڭ قيىن جەرلەرگە جىبەرىلەتىن ارتيللەريا ديۆيزياسىندا قىزمەت ەتكەن.
